போடி தொகுதியில் தீவிர பிரசாரம்: அ.தி.மு.க. ஆட்சி மீண்டும் அமைந்ததும் ரேஷன் பொருட்கள் வீடு தேடி வரும் - தேனி எம்.பி. ப.ரவீந்திரநாத் பேச்சு

தேனி, 

தேனி மாவட்டம் போடி சட்டமன்ற தொகுதியில் அ.தி.மு.க. வேட்பாளராக துணை முதல்-அமைச்சரும், அ.தி.மு.க. ஒருங்கிணைப்பாளருமான ஓ.பன்னீர்செல்வம் போட்டியிடுகிறார். அவருக்காக தொகுதியில் அ.தி.மு.க.வினர் தீவிர வாக்குசேகரிப்பில் ஈடுபட்டு வருகின்றனர்.

ஓ.பன்னீர்செல்வத்துக்கு வாக்குசேகரித்து, அவருடைய மகனும், தேனி எம்.பி.யுமான ப.ரவீந்திரநாத் போடி தொகுதிக்கு உட்பட்ட மாரியம்மன்கோவில்,  திருச்செந்தூர், முத்துத்தேவன்பட்டி, வீரபாண்டி, வயல்பட்டி, கொடுவிலார்பட்டி, சிவலிங்கநாயக்கன்பட்டி, பாலகிருஷ்ணாபுரம், சங்ககோணாம்பட்டி, கோபாலபுரம், அம்பாசமுத்திரம் ஆகிய இடங்களில் நேற்று தீவிர பிரசாரத்தில் ஈடுபட்டார்.

பிரசாரத்தின் போது ப.ரவீந்திரநாத் எம்.பி. பேசியதாவது:-

தமிழகத்தில் எம்.ஜி.ஆர்., ஜெயலலிதா ஆகியோர் நல்லாட்சி நடத்தினார்கள். அவர்களை தொடர்ந்து முதல்-அமைச்சர் எடப்பாடி பழனிசாமி, துணை முதல்&அமைச்சர் ஓ.பன்னீர்செல்வம் ஆகியோர் இணைந்து நல்லாட்சி நடத்தி வருகிறார்கள். இந்த நல்லாட்சி தொடர அ.தி.மு.க.வுக்கு மக்கள் தொடர்ந்து ஆதரவு அளிக்க வேண்டும்.

அ.தி.மு.க. ஆட்சியில் பெண்களுக்காக 17 வகையான நலத்திட்டங்களை ஜெயலலிதா கொண்டு வந்தார். அந்த திட்டங்கள் அனைத்தும் மக்களின் கரங்களில் சென்றடைந்தன. பெண்களின் பணிச்சுமையை குறைக்க விலையில்லா மிக்சி, கிரைண்டர், மின்விசிறி வழங்கப்பட்டது. இந்த முறையும் தேர்தல் அறிக்கையில் பல்வேறு அறிவிப்புகள் உள்ளன. அனைத்து வீடுகளுக்கும் வாஷிங் மெஷின் வழங்கப்படும். முதியோர் உதவித்தொகை ரூ.2 ஆயிரமாக உயர்த்தி வழங்கப்படும். மீண்டும் அ.தி.மு.க. ஆட்சி அமைந்தவுடன் ரேஷன் பொருட்கள் வீடு தேடி வரும்.

போடி தொகுதியில் துணை முதல்-அமைச்சர் ஓ.பன்னீர்செல்வம் எண்ணற்ற திட்டங்களை நிறைவேற்றி உள்ளார். அரசு பொறியியல் கல்லூரி, சட்டக்கல்லூரி, கலை மற்றும் அறிவியல் கல்லூரி, கால்நடை மருத்துவ கல்லூரி மற்றும் ஆராய்ச்சி நிலையம், பாலிடெக்னிக் கல்லூரி, ஐ.டி.ஐ. போன்ற கல்வி நிறுவனங்களை கொண்டு வந்துள்ளார். இந்த நல்லாட்சி தொடர இரட்டை இலை சின்னத்தில் வாக்களிக்குமாறு கேட்டுக் கொள்கிறேன்.

இவ்வாறு அவர் பேசினார்.

இந்த பிரசாரத்தில் தேனி ஒன்றிய செயலாளர் ஆர்.டி.கணேசன், பா.ஜனதா, பா.ம.க., பெருந்தலைவர் மக்கள் கட்சி, தமிழ்மாநில காங்கிரஸ், தமிழக மக்கள் முன்னேற்ற கழகம் உள்ளிட்ட கூட்டணி கட்சிகளின் நிர்வாகிகள் பலர் கலந்துகொண்டனர்.