கிருஷ்ணகிரி மாவட்டத்தில் மூத்த குடிமக்களிடம், தபால் ஓட்டுகள் பெறும் பணி தீவிரம்

கிருஷ்ணகிரி,

கிருஷ்ணகிரி மாவட்டத்தில், ஊத்தங்கரை (தனி), பர்கூர், கிருஷ்ணகிரி, வேப்பனப்பள்ளி, ஓசூர், தளி ஆகிய 6 சட்டசபை தொகுதிகளில், ஏப்ரல் மாதம் 6-ந் தேதி தேர்தல் நடக்கிறது. இந்த தேர்தலில் வாக்குச்சாவடிக்கு சென்று வாக்களிக்க முடியாத, 80 வயதுக்கு மேற்பட்டவர்கள், மாற்றுத்திறனாளிகள் மற்றும் கொரோனா நோய் தொற்றால் பாதிக்கப்பட்ட வாக்காளர்கள் தங்களது வாக்குகளை தபால் மூலம் செலுத்தலாம் என மாவட்ட தேர்தல் அலுவலரும், கலெக்டருமான ஜெயசந்திரபானு ரெட்டி தெரிவித்தார்.

மாவட்டத்தில் உள்ள 6 தொகுதிகளிலும், 13 ஆயிரத்து 723 மாற்றுத்திறனாளி வாக்காளர்களும், 80 வயதுக்கு மேற்பட்ட 28 ஆயிரத்து 543 வாக்காளர்கள் என மொத்தம் 42 ஆயிரத்து 266 வாக்காளர்கள் உள்ளனர். இவர்களுக்கு தபால் வாக்குகள் அளிக்க படிவம் 12டி ஏற்கனவே வழங்கப்பட்டுள்ளது. அதன்படி 6 தொகுதிகளிலும் 2,332 மூத்த குடிமக்களும், 704 மாற்றுத்திறனாளிகள் என மொத்தம், 3,036 பேர் தபால் வாக்களிக்க படிவம் 12டி வழங்கி உள்ளனர்.

இந்த நிலையில், கிருஷ்ணகிரியில் தபால் வாக்களிக்க படிவம் பெறப்பட்டுள்ள மூத்த குடிமக்கள், மாற்றுத்திறனாளிகள் மற்றும் கொரோனா பாதிக்கப்பட்டவர்களிடம் அலுவலர்கள், அவர்களின் இருப்பிடத்திற்கே சென்று தபால் வாக்குகளை பெற்று வருகின்றனர். இந்த பணியில், மண்டல அலுவலர், உதவியாளர், மைக்ரோ அப்சர்வர், ஒரு கேமரா மேன் மற்றும் ஒரு போலீஸ் என 5 பேர் கொண்ட குழுவினர் இடம் பெற்றுள்ளனர். இவர்கள் பூத் கமிட்டி அல்லது வட்ட செயலாளர் முன்னிலையில், மூத்த குடிமக்களிடம் விண்ணப்பங்களில் கையொப்பம் பெற்று, வாக்குச்சீட்டில் உள்ள சின்னத்தில் டிக் செய்ய சொல்லி, அதை பெற்று கவரில் வைத்து சீல் வைக்கின்றனர். இவற்றை தேர்தல் நடத்தும் அலுவலரிடம் ஒப்படைத்து வருகிறார்கள்.