<
கல்லால் தாக்கி வாலிபர் கொலை; பிணத்துடன் உறவினர்கள் மறியல்
கல்லால் தாக்கி கொலை செய்யப்பட்ட வாலிபரின் உடலை சாலையில் வைத்து உறவினர்கள் மறியல் போராட்டத்தில் ஈடுபட்டனர்.
திண்டுக்கல்:
கல்லால் தாக்கி கொலை
திண்டுக்கல் லயன்தெருவை சேர்ந்தவர் மனோஜ் (வயது 30). கடந்த சில நாட்களுக்கு முன்பு இவர், செல்லாண்டியம்மன் கோவில் தெருவில் நின்று நண்பர்களுடன் பேசிக்கொண்டிருந்தார்.
அப்போது மதுபோதையில் அங்கு வந்த சிலர் மனோஜிடம் தகராறில் ஈடுபட்டனர். தகராறு முற்றிய நிலையில் ஆத்திரமடைந்த அவர்கள் மனோஜை கல்லால் தாக்கிவிட்டு தப்பிச்சென்றுவிட்டனர்.
இதில் படுகாயமடைந்த மனோஜ் சிகிச்சைக்காக திண்டுக்கல் அரசு மருத்துவமனையில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்த நிலையில், சிகிச்சை பலனின்றி நேற்று பரிதாபமாக இறந்தார்.
இதனால் அதிர்ச்சியடைந்த உறவினர்கள், மனோஜின் உடலை வாங்கி சவப்பெட்டியில் வைத்துக்கொண்டு திண்டுக்கல்-திருச்சி சாலையில் கொண்டு சென்றனர்.
உறவினர்கள் மறியல்
பின்னர் கல்லறை தோட்டம் அருகே அந்த சவப்பெட்டியை சாலையில் வைத்துவிட்டு உறவினர்கள் மறியல் போராட்டத்தில் ஈடுபட்டனர். அப்போது, மனோஜை கல்லால் தாக்கி கொலை செய்தவர்களில் சிலரை மட்டுமே போலீசார் கைது செய்துள்ளனர்.
இந்த சம்பவத்தில் தொடர்புடைய அனைவரையும் கைது செய்ய வேண்டும் என்று வலியுறுத்தி கோஷமிட்டனர்.
இதுகுறித்து தகவல் அறிந்த போலீஸ் துணை சூப்பிரண்டு மணிமாறன் தலைமையிலான போலீசார் விரைந்து வந்து, மறியலில் ஈடுபட்டவர்களுடன் பேச்சுவார்த்தை நடத்தினர்.
அப்போது, மனோஜ் தாக்கப்பட்ட அன்றே வழக்குப்பதிவு செய்யப்பட்டு 6 பேர் கைது செய்யப்பட்டனர். மேலும் இந்த சம்பவத்தில் தொடர்புடைய 4 பேரிடம் விசாரணை நடத்தப்பட்டு அவர்களும் தற்போது கைது செய்யப்பட்டுள்ளனர் என்று தெரிவித்தனர்.
இதில் சமாதானம் அடைந்த மனோஜின் உறவினர்கள் மறியலை கைவிட்டு அங்கிருந்து கலைந்து சென்றனர்.
-------
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
