<
போலீசாரிடம் இருந்து தப்பியோடிய ரவுடி குளத்தில் பிணமாக கிடந்தார்
கும்பகோணத்தில், போலீசாரிடம் இருந்து தப்பியோடிய ரவுடி குளத்தில் பிணமாக கிடந்தார். இதனால் அவரது இறப்பு தொடர்பாக போலீசார் மீது நடவடிக்கை எடுக்க வேண்டும் என அவரது உறவினர்கள் கோரிக்கை விடுத்துள்ளனர்.
கும்பகோணம்:
கும்பகோணத்தில், போலீசாரிடம் இருந்து தப்பியோடிய ரவுடி குளத்தில் பிணமாக கிடந்தார். இதனால் அவரது இறப்பு தொடர்பாக போலீசார் மீது நடவடிக்கை எடுக்க வேண்டும் என அவரது உறவினர்கள் கோரிக்கை விடுத்துள்ளனர்.
ரவுடி
தஞ்சை மாவட்டம் கும்பகோணத்தை அடுத்த தாராசுரம் எம்.ஜி.ஆர். காலனியை சேர்ந்தவர் சிலம்பரசன்(வயது 30). இவர் சென்னையில் மெக்கானிக்காக வேலை செய்து வந்தார். இவருக்கு திருமணமாகி 2 குழந்தைகள் உள்ளன.
இவர் மீது மயிலாடுதுறை மாவட்டம் சீர்காழி, திருவாரூர் மாவட்டம் மன்னார்குடி, கும்பகோணம் உள்பட பல்ேவறு போலீஸ் நிலையங்களில் கொலை, கொள்ளை வழக்குகள் நிலுவையில் உள்ளன. மேலும் ரவுடி பட்டியலில் இவரது பெயர் இடம் பெற்றுள்ளது.
போலீசார் சுற்றி வளைத்தனர்
சிலம்பரசனின் பெற்றோர் கும்பகோணத்தை அடுத்த தாராசுரத்தில் எம்.ஜி.ஆர். காலனியில் வசித்து வருகின்றனர். அவர்களை பார்ப்பதற்காக சிலம்பரசன் நேற்று முன்தினம் தாராசுரத்திற்கு வந்துள்ளார். இந்த தகவல் போலீசாருக்கு தெரிய வந்தது.
இதனையடுத்து சிலம்பரசனை பிடிக்க போலீசார் திட்டம் தீட்டினர். நேற்று முன்தினம் இரவு சிலம்பரசன் இருந்த இடத்தை போலீசார் சுற்றி வளைத்தனர். தன்னை போலீசார் நெருங்கி விட்டதை தெரிந்து கொண்ட சிலம்பரசன் போலீசிடம் சிக்கிக்கொண்டால் தன்னை ஒரு வழி செய்து விடுவார்கள். அதனால் அவர்களிடம் சிக்கிக்கொள்ளாமல் எப்படியாவது தப்பித்து விட வேண்டும் என்று முடிவு செய்தார்.
குளத்தில் பிணமாக கிடந்தார்
இதனையடுத்து வீட்டில் இருந்து லாவகமாக தப்பித்த சிலம்பரசன், அங்கு தன்னை பிடிப்பதற்காக தயாராக இருந்த போலீசாரிடம் சிக்காமல் வேகமாக ஓடினார். போலீசாரும் விடாமல் அவரை துரத்தி சென்றனர். இரவு நேரம் என்பதால் சிலம்பரசனை கண்டு பிடிப்பதில் போலீசாருக்கு சிரமம் ஏற்பட்டது.
வீட்டை விட்டு ஓடிய சிலம்பரசன் வீட்டு பின்புறம் உள்ள குளத்தில் குதித்து தப்பிக்க முயற்சித்து உள்ளார். சிலம்பரசனை துரத்தி சென்ற போலீசார் அவரை பிடிக்க முடியாமல் குளம் இருந்த பகுதி வரையில் சென்று பார்த்து விட்டு திரும்பி விட்டனர். இந்த நிலையில் குளத்தில் குதித்த ரவுடி சிலம்பரசன் நேற்று அதிகாலை வாயில் ரத்தம் வந்த நிலையில் குளத்தில் பிணமாக கிடந்துள்ளார்.
போலீசார் தாக்கியதால் இறந்ததாக புகார்
இந்த தகவல் அறிந்த சிலம்பரசன் உறவினர்கள் அதிர்ச்சியடைந்து அந்த குளத்திற்கு திரண்டு வந்தனர். அங்கு பிணமாக கிடந்த சிலம்பரசன் உடலை பார்த்து கதறி அழுதனர். இதுகுறித்து தகவல் அறிந்த கும்பகோணம் தாலுகா போலீசார் சிலம்பரசன் உடலை மீட்டு கும்பகோணம் அரசு மருத்துவமனைக்கு பிரேத பரிசோதனைக்காக கொண்டு சென்றனர்.
சிலம்பரசனின் உறவினர்கள் கும்பகோணம் அரசு மருத்துவமனையில் ஒன்று கூடினர். மருத்துவமனையில் ஏராளமானோர் கூடியதால் அங்கு பெரும் பரபரப்பு ஏற்பட்டது. சிலம்பரசன் சாவுக்கு போலீசார்தான் காரணம். சிலம்பரசனை போலீசார் துரத்தி பிடிக்க முயன்றபோது அவரை பிடிக்க முடியாததால் தங்கள் கையில் இருந்த கட்டையால் சிலம்பரசனை போலீசார் தாக்கியுள்ளனர். இதனால்தான் சிலம்பரசன் இறந்துள்ளார். எனவே போலீசார் மீது நடவடிக்கை எடுக்க வேண்டும் என சிலம்பரசனின் உறவினர்கள் கூறினர்.
பிரேத பரிசோதனை முடிவுக்கு பிறகே
இது குறித்து போலீசார் கூறும்போது, சிலம்பரசன் மீது ஏராளமான வழக்குகள் உள்ளன. ரவுடி பட்டியலில் உள்ளார். போலீசார் அவரை தேடியது வழக்கமான நடவடிக்கைதான்.
ஆனால் குளத்தில் விழுந்த இறந்த சம்பவத்திற்கு போலீஸ் காரணம் இல்லை. பிரேத பரிசோதனை நடந்துள்ளது. பிரேத பரிசோதனை முடிவு வந்த பிறகே சிலம்பரசன் இறப்புக்கான காரணம் தெரிய வரும் என தெரிவித்தனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
