சமையல் செய்வதற்காக அடுப்பை பற்றவைத்தபோது உடலில் தீப்பற்றி பெண் சாவு

மீன்சுருட்டி:

அரியலூர் மாவட்டம் மீன்சுருட்டி அருகே உள்ள வங்குடி தெற்கு தெருவை சேர்ந்தவர் முருகானந்தம். இவருடைய மனைவி வள்ளி (வயது 45). இவர்களுக்கு ஒரு மகளும், 2 மகன்களும் உள்ளனர். முருகானந்தம் கடந்த சில ஆண்டுகளுக்கு முன்பு உடல்நிலை சரியில்லாமல் இறந்துவிட்டார். இந்நிலையில் கடந்த 8-ந் தேதி மதியம் தனது வீட்டில் சமையல் செய்வதற்காக வள்ளி, அடுப்பில் மண்எண்ணெய் ஊற்றி பற்ற வைத்தபோது, அருகில் இருந்த மண்எண்ணெய் கேன் கீழே விழுந்ததில் அவருடைய சேலையில் தீப்பற்றியது. இதையடுத்து உடலில் தீ பரவியது. அவருடைய அலறல் சத்தம் கேட்டு, அங்கு வந்த அக்கம், பக்கத்தினர் தீயை அணைத்து வள்ளியை மீட்டு 108 ஆம்புலன்ஸ் மூலம் ஜெயங்கொண்டம் அரசு மருத்துவமனையில் சிகிச்சைக்காக சேர்த்தனர். பின்னர் மேல் சிகிச்சைக்காக தஞ்சை மருத்துவ கல்லூரி மருத்துவமனையில் அனுமதிக்கப்பட்ட அவர், அங்கு தீவிர சிகிச்சை அளித்தும் பலனின்றி நேற்று மதியம் இறந்தார். இது குறித்து அவரது உறவினர் சிவானந்தம் கொடுத்த புகாரின்பேரில் மீன்சுருட்டி போலீஸ் சப்-இன்ஸ்பெக்டர் ரமேஷ் வழக்குப்பதிவு செய்து வள்ளியின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தார். மேலும் இது குறித்து விசாரணை நடத்தி வருகிறார்.