அரியமங்கலத்தில் மதுபோதையில் வாய்க்காலில் தவறி விழுந்து பழவியாபாரி பலி

பொன்மலைப்பட்டி, 

திருச்சி அரியமங்கலம் உய்யக்கொண்டான் வாய்க்காலில் ஒருவர் இறந்து கிடப்பதாக நேற்று காலை அரியமங்கலம் போலீசாருக்கு தகவல் கிடைத்தது. இதையடுத்து அரியமங்கலம் போலீசார் சம்பவ இடத்திற்கு சென்று விசாரணை நடத்தினர். விசாரணையில், திருச்சி தெற்கு உக்கடை அரியமங்கலத்தை சேர்ந்த தேசிங்குராஜா (வயது 40) என்பதும், காந்தி மார்க்கெட்டில் தள்ளுவண்டியில் பழ வியாபாரம் செய்து வந்ததும் தெரியவந்தது. 

அவர் நேற்று காலை அரியமங்கலம் உய்யக்கொண்டான் வாய்க்கால் பாலத்தின் தடுப்பு கட்டையின் மீது அமர்ந்திருந்துள்ளார். அப்போது அவர் மது போதையில் நிலை தடுமாறி வாய்க்காலில் விழுந்து இறந்திருக்கலாம் என போலீஸ் தரப்பில் கூறப்படுகிறது. மேலும் இதுகுறித்து வழக்குப்பதிவு செய்து இறந்த தேசிங்குராஜாவின் உடலை மீட்டு திருச்சி அரசு மருத்துவமனைக்கு உடற்கூறு ஆய்வுக்காக அனுப்பி வைத்தனர்.