ராமநாதபுரம்-சத்திரக்குடி இடையே-அதிநவீன எந்திரம் மூலம் தண்டவாளம் உறுதிப்படுத்தும் பணி மும்முரம்

அகில இந்திய புண்ணியதலமான ராமேசுவரம் முதல் நாட்டின் பல்வேறு பகுதிகளுக்கு ரெயில்கள் இயக்கப்பட்டு வந்தது. கொரோனா பரவல் காரணமாக பெரும்பாலான ரெயில்கள் நிறுத்தப்பட்டு தற்போது சென்னை, திருச்சி உள்ளிட்ட ஒருசில ரெயில்கள் மட்டுமே இயக்கப்பட்டு வருகின்றன. விரைவில் அனைத்து பகுதிகளுக்கும் ரெயில் சேவை தொடங்க திட்டமிட்ட நிலையில் மீண்டும் கொரோனா பரவல் தொடங்கியதால் ரெயில்கள் இயக்குவதில் சிக்கல் ஏற்பட்டுள்ளது.
இதன் தொடர்ச்சியாக தற்போது ராமநாதபுரம்-சத்திரக்குடி இடையே 11 கி.மீட்டர் தூரத்திற்கு இந்த ரெயில் தண்டவாளம் உறுதிபடுத்தும் பணி நடைபெற்று வருகிறது. ஏறத்தாழ ரூ.2 கோடி மதிப்பிலான இந்த திட்டபணியில் வடமாநில தொழிலாளர்கள் 25 பேர் மற்றும் அதிகாரிகள் 5 பேர் என மொத்தம் 30 பேர் ஈடுபட்டுள்ளனர். மத்திய பிரதேசத்தில் இருந்து இதற்காக பிரத்யேக அதிநவீன வெல்டிங் எந்திரம் வரவழைக்கப்பட்டுள்ளது.
கடந்த 2007-ம் ஆண்டு மதுரை-ராமேசுவரம் இடையே அகல ரெயில்பாதை போடப்பட்ட பின்னர் இந்த தண்டவாளம் பிரித்து உறுதியுடையதாக மாற்றவில்லை என்பது குறிப்பிடத்தக்கது. 15 ஆண்டுகளுக்கு பின்னர் கொரோனா பரவல் காரணமாக கிடைத்துள்ள ரெயில் போக்குவரத்தின்மை காரணமாக இந்த பணி தற்போது முழுவீச்சில் நடைபெற்று வருகிறது.
இதன் தொடர்ச்சியாக மதுரை வரை திட்டமதிப்பீடு தயாரிக்கப்பட்டுள்ளதாகவும், அதற்கான நிதி ஒதுக்கப்பட்டதும் இந்த பணி விரைவில் தொடங்க உள்ளதாகவும் ரெயில்வே அதிகாரிகள் தெரிவித்தனர்.