தூத்துக்குடியில் பலசரக்கு கடையில் ரூ.1 லட்சம் திருட்டு 3பேர் கைது

தூத்துக்குடியில் பலசரக்கு கடையில் ரூ.1 லட்சம் பணம் திருடிய 3 பேரை போலீசார் கைது செய்தனர்.

இது குறித்து போலீஸ் தரப்பில் கூறப்பட்டதாவது:-

தூத்துக்குடி போல்பேட்டையை சேர்ந்தவர் ஆனந்தராஜ் (வயது 44). இவர் அந்த பகுதியில் பலசரக்கு கடை நடத்தி வருகிறார். கடந்த 12-ந் தேதி இரவு வழக்கம் போல் கடையை பூட்டிவிட்டு சென்றாராம். மறுநாள் கடையை திறந்த போது, கடையின் முன்பக்க ஷட்டர் உடைக்கப்பட்டு இருந்தது. கடையில் மேஜை டிராயரில் வைத்து இருந்த ரூ.1 லட்சத்து 10 ஆயிரம் ரொக்கப்பணத்தையும் மர்ம ஆசாமிகள் திருடி சென்று இருப்பது தெரியவந்தது.

இது குறித்த புகாரின் பேரில் தூத்துக்குடி வடபாகம் போலீசார் வழக்கு பதிவு செய்து, திருட்டு சம்பவத்தில் ஈடுபட்டதாக, கன்னியாகுமரி மாவட்டத்தை சேர்ந்த மாரியப்பன், தூத்துக்குடி ரகுமத்துல்லாபுரத்தை சேர்ந்த கோவிந்தராஜன், கந்தசிவா ஆகிய 3 பேரையும் கைது செய்தனர். 

அவர்களிடம் இருந்து பணத்தையும் போலீசார் பறிமுதல் செய்தனர். இதில் மாரியப்பன் மீது கன்னியாகுமரி மாவட்டத்தில் 7 திருட்டு வழக்குகள் இருப்பது குறிப்பிடத்தக்கது ஆகும்.