செட்டிநாடு கைத்தறி சேலைகள் தேக்கம்

செட்டிநாடு என்றாலே முதலில் கட்டிட கலைகளுக்கு சிறந்த எடுத்துக்காட்டு தான் நினைவுக்கு வரும். அதற்கு அடுத்தப்படியாக செட்டிநாடு உணவு வகைகளும், செட்டிநாட்டு பகுதியில் தயாராகும் கைத்தறி சேலை ரகங்களும் தான்.
காரைக்குடி மற்றும் அதை சுற்றியுள்ள செட்டிநாடு பகுதியில் அதிகளவில் கலைநயமிக்க அரண்மனை வீடுகள் உள்ளன.. இந்த வீடுகளை பார்த்து ரசிப்பதற்காக வெளி மாநிலங்கள் மற்றும் வெளி நாடுகளில் இருந்து ஏராளமான சுற்றுலா பயணிகள் இங்கு வருவது வழக்கம். இவ்வாறு வரும் அவர்கள் இங்கு கைத்தறி மூலம் தயாராகும் செட்டி நாட்டு சுங்கடி சேலைகள் மற்றும் கண்டாங்கி சேலைகளை வாங்கி செல்வார்கள்.
சேலைகள் தேக்கம்

சுற்றுலா பயணிகள் வராததால் செட்டிநாடு பகுதியில் கைத்தறி சேலைகள் விற்பனையாகாமல் தேங்கி கிடக்கின்றன. இதனால் கைத்தறி நெசவாளர்கள் மிகவும் பாதிக்கப்பட்டு உள்ளனர்.
இதுகுறித்து கானாடுகாத்தான் பகுதியில் தறி கூடம் நடத்தி வரும் வெங்கட்ராமன் கூறியதாவது-
ஏற்கனவே கடந்தாண்டு நிலவிய கொரோனா தொற்று காரணமாக எங்களது தொழில் முற்றிலும் பாதிக்கப்பட்டிருந்த நிலையில் பின்னர் அந்த பாதிப்பில் இருந்து தற்போது தான் மீண்டு வந்துள்ளோம். இந்நிலையில் தற்போது கொரோனா 2-வது அலை காரணமாக இரவு ஊரடங்கு மற்றும் வாரந்தோறும் ஞாயிற்றுக்கிழமை முழு ஊரடங்கு மேலும் பாதிப்பை ஏற்படுத்தி உள்ளது. சுற்றுலா பயணிகளுக்கு தடை விதிக்கப்பட்டு இருப்பதால் கைத்தறி சேலைகள் விற்பனையாகாமல் தேங்கி கிடக்கின்றன. இரவு நேர ஊரடங்கால் சரக்கு வாகனங்களில் வெளிமாவட்டங்கள், வெளிமாநிலங்களுக்கு செட்டிநாடு கைத்தறி சேலைகள் அனுப்புவதில் பல்வேறு சிரமங்களை சந்திக்க வேண்டிய நிலை உள்ளது. இவ்வாறு அவர் கூறினார்.