உறவினரை பீர்பாட்டிலால் தாக்கியவர் கைது

வெள்ளியணை அருகே உள்ள சின்னமநாயக்கன்பட்டியை சேர்ந்தவர்கள் கணேசன் (வயது 33), சண்முகம் (28). உறவினர்களான இருவரும், பஸ் பாடி கட்டும் நிறுவனத்தில் கூலி வேலை செய்து வருகிறார்கள். இவர்களுக்கு இடையே பணம் கொடுக்கல் வாங்கல் பிரச்சினை இருந்து வந்துள்ளது. இந்த நிலையில் நேற்று முன்தினம் காலையில் அங்கு உள்ள மாரியம்மன் கோவிலில் 2 பேரும் பணம் கொடுக்கல் வாங்கல் சம்பந்தமாக பேசிக்கொண்டிருந்தனர். அப்போது அவர்களுக்கு இடையே மீண்டும் பிரச்சினை ஏற்பட்டு, காலி பீர்பாட்டிலால் சண்முகம் கணேசனை தாக்கியுள்ளார். இதில் காயமடைந்த கணேசன் சிகிச்சைக்காக கரூர் அரசு மருத்துவ கல்லூரி மருத்துவமனையில் அனுமதிக்கப்பட்டார். இதுகுறித்த புகாரின் பேரில் வெள்ளியணை போலீசார் சண்முகத்தை கைது செய்து விசாரணை நடத்தி வருகின்றனர்.