வலை விரித்து மீன்களை அள்ளிய கிராம மக்கள்

சிவகங்கை மாவட்டத்தில் கடந்த ஆண்டு பருவ மழை நன்றாக பெய்ததால் ஏராளமான கண்மாய்கள், ஊருணிகள் உள்ளிட்ட நீர்நிலைகள் நிரம்பி காணப்பட்டது. இந்த தண்ணீரை பயன்படுத்தி கிராம மக்கள் விவசாயம் செய்தனர். மேலும் நிரம்பிய கண்மாய்கள் மற்றும் ஊருணிகளில் ஏராளமான மீன்குஞ்சுகள் இனப்பெருக்கத்திற்காக விடப்பட்டது.
இதில் கல்லுவயல், புலிக்குத்தி, மணப்பட்டி, கல்லுப்பட்டி உள்ளிட்ட கிராமங்களைச் சேர்ந்த சிறுவர்கள் முதல் பெரியர்கள் மற்றும் பெண்கள் அதிகாலையிலேயே கண்மாயில் திரண்டனர். அதன் பின்னர் மீன்பிடிக்க பயன்படுத்தப்படும் ஊத்தா, கச்சா, மடி வலை, கொசு வலை உள்ளிட்ட உபகரணங்களை வைத்து கண்மாய்க்குள் இறங்கினர். இதில் அவர்களின் வலையில் குரவை, கெளுத்தி, கெண்டை, ஜிலேபி, அயிரை ஆகிய வகைகளைச் சேர்ந்த ஏராளமான மீன்கள் பிடிபட்டன. வலையில் ஏராளமான மீன்கள் கிடைத்ததால் கிராம மக்கள் மகிழ்ச்சியுடன் அள்ளிச் சென்றனர். புலிக்குத்தி, மணப்பட்டி உள்ளிட்ட கிராமங்களில் அன்று இரவு மீன் குழம்பு வைத்து சாப்பிட்டனர்.