மைசூரு அருகே வரதட்சணை கொடுமையால் திருமணமான ஒரே மாதத்தில் புதுப்பெண் தூக்குப்போட்டு தற்கொலை செய்து கொண்டார்.

மைசூரு:

. 

மைசூரு மாவட்டம் நஞ்சன்கூடு தாலுகா சரகூரு கிராமத்தை சேர்ந்தவர் நாகராஜா நாயக். இவரது மகள் ஆஷா ராணி(வயது 28). இவருக்கும், ைமசூரு டவுன் ஸ்ரீராமபுரம் எஸ்.பி.எம். காலனியை சேர்ந்த பிரதீப் என்பவருக்கும் கடந்த மாதம் 4-ந்தேதி திருமணம் நடந்தது. திருமணத்தின் போது 130 கிராம் நகைகள், ரூ.5 லட்சம் ரொக்கத்தை வரதட்சணையாக பிரதீப்புக்கு, ஆஷா ராணியின் பெற்றோர் கொடுத்து இருந்ததாக தெரிகிறது. 

திருமணம் முடிந்த சில நாட்கள் மகிழ்ச்சியாக வாழ்ந்த ஆஷா ராணி, பிரதீப்பின் வாழ்க்கையில் வரதட்சணை என்ற அரக்கனால் புயல்வீச தொடங்கியது. அதாவது கூடுதலாக வரதட்சணை வாங்கி வரும்படி ஆஷா ராணியை, பிரதீப் அவரது பெற்றோர் செல்வ நாயக், சரோஜா ஆகியோர் கொடுமைப்படுத்தி வந்ததாக தெரிகிறது. ஆனாலும் வரதட்சணை வாங்கி வர ஆஷா ராணி மறுத்து உள்ளார். இதனால் அவரை பிரதீப் அடித்து, உதைத்து வந்ததாக தெரிகிறது. 

மனம் உடைந்த ஆஷா ராணி தற்கொலை செய்ய முடிவு செய்தார். இந்த நிலையில் நேற்று முன்தினம் வீட்டில் யாரும் இல்லாத போது ஆஷா ராணி திடீரென தூக்குப்போட்டு தற்கொலை செய்து கொண்டார். 

இதற்கிடையே வெளியே சென்று இருந்த பிரதீப், செல்வ நாயக், சரோஜா ஆகியோர் வீட்டிற்கு வந்து பார்த்த போது ஆஷா ராணி தூக்கில் தொங்கினார். இதனை பார்த்து அதிர்ச்சி அடைந்த அவர்கள் உடனடியாக ஆஷா ராணியின் பெற்றோருக்கு தகவல் கொடுத்தனர். 

இதனை கேட்டு அதிர்ச்சியில் உறைந்த பெற்றோர், ஆஷா ராணியின் கணவர் வீட்டிற்கு விரைந்து வந்தனர். பின்னர் தூக்கில் தொங்கிய மகளின் உடலை பார்த்து கதறி அழுதனர். இதுபற்றி தகவல் அறிந்த குவெம்பு போலீசார் சம்பவ இடத்திற்கு விரைந்து வந்து பார்வையிட்டனர். 

பின்னர் ஆஷா ராணியின் உடலை கைப்பற்றி பிரேத பரிசோதனைக்காக ஆஸ்பத்திரிக்கு அனுப்பி வைத்தனர். இதற்கிடையே ஆஷாராணியின் தந்தை நாகராஜா நாயக், குவெம்புநகர் போலீஸ் நிலையத்தில் அளித்த புகாரில் கூறி இருந்ததாவது:-

எனது மகள் ஆஷா ராணியை கணவர் பிரதீப்பும், அவளது மாமனார்-மாமியாரான செல்வ நாயக், சரோஜாவும் கூடுதல் வரதட்சணை வாங்கி வரும்படி கொடுமைப்படுத்தி உள்ளனர்.

 இதனால் மனம் உடைந்த தனது மகள் தூக்குப்போட்டு தற்கொலை செய்து கொண்டார். அவரை தற்கொலைக்கு தூண்டிய 3 பேர் மீதும் நடவடிக்கை எடுக்க வேண்டும் என்று கூறி இருந்தார். அவரது புகாரின்பேரில் போலீசார் வழக்குப்பதிவு செய்து ஆஷாராணியின் கணவர் பிரதீப், அவரது பெற்றோர் செல்வ நாயக்- சரோஜா ஆகிய 3 பேரிடம் விசாரணை நடத்தி வருகின்றனர்.

திருமணம் முடிந்து ஒரு மாதமே ஆன நிலையில் புதுப்பெண் தூக்குப்போட்டு தற்கொலை செய்து கொண்ட சம்பவம் மைசூருவில் சோகத்தையும், அதிர்ச்சியையும் ஏற்படுத்தியுள்ளது.