நெல்லை- அம்பையில் 22 மோட்டார்சைக்கிள்கள் பறிமுதல்

அம்பை, மே:

கொரோனா பரவலைக் கட்டுப்படுத்த தமிழகத்தில் முழு ஊரடங்கு அமலில் உள்ளது. இதையொட்டி அம்பை துணை போலீஸ் சூப்பிரண்டு பிரான்சிஸ், இன்ஸ்பெக்டர் முத்து கண்ணன், சப்-இன்ஸ்பெக்டர்கள் சைமன், ஆனந்த ஜோதி ஆகியோர் தீவிர பாதுகாப்பு பணியில் ஈடுபட்டனர். அப்போது, ஊர்க்காடு பகுதியில் காசு வைத்து சூதாடிய 10 பேரை கைது செய்து அவர்களிடமிருந்து ரூ.15,000 பறிமுதல் செய்யப்பட்டது. மேலும் முழு ஊரடங்கை மீறி வெளியில் சுற்றித்திரிந்த 13 பேர் மீது வழக்குப்பதிவும், தேவையின்றி வாகனங்களில் சுற்றியவர்களிடம் இருந்து 19 மோட்டார் சைக்கிளும் பறிமுதல் செய்யப்பட்டது. முழு ஊரடங்கு காரணமாக அம்பை பகுதியில் அனைத்து கடைகளும் மூடப்பட்டது. பொதுமக்கள் நடமாட்டம் இன்றி சாலைகள் வெறிச்சோடி காணப்பட்டன.

இதேபோல் ஊரடங்கை மீறி, நெல்லை அருகே சிவந்திப்பட்டி பகுதியில் வெளியில் சுற்றி திரிந்தவர்களின் 3 மோட்டார் சைக்கிள்களை சிவந்திபட்டி போலீசார் பறிமுதல் செய்தனர்.