ஊரடங்கை மீறி வெளியே சுற்றிய 11 பேர் மீது வழக்கு; இருசக்கர வாகனங்கள் பறிமுதல்

ஆண்டிமடம்:

அரியலூர் மாவட்டம் ஆண்டிமடம் பகுதியில் ஊரடங்கையொட்டி காலை 6 முதல் காலை 10 மணி வரை அத்தியாவசிய பொருட்கள் வாங்குவதற்காக மட்டும் பொதுமக்கள் வெளியே வர அனுமதிக்கப்பட்டுள்ளது. மேலும் அவசர காரணங்களுக்காக மற்றும் தேவைகளுக்காக மாவட்டம் விட்டு மாவட்டம் மற்றும் மாவட்டத்துக்கு உள்ளே செல்ல இ-பதிவு கட்டாயமாக்கப்பட்டுள்ளது. இந்நிலையில் நேற்று ஆண்டிமடம் நான்கு ரோடு சந்திப்பில் போலீசார் தீவிர வாகன சோதனையில் ஈடுபட்டனர். அப்போது இ-பதிவு பெறாமல் வெளியே சுற்றிய 11 பேர் மீது போலீசார் வழக்குப்பதிந்து இருசக்கர வாகனங்களை பறிமுதல் செய்தனர்.