கடைவீதிகளில் காய்கறி, மளிகை பொருட்கள் வாங்க அலைமோதிய பொதுமக்கள்

தமிழகத்தில் நாளுக்கு நாள் கொரோனா 2-வது அலை அதிகரித்து வருகிறது. கொரோனா பரவலை தடுக்க அரசும் பல்வேறு நடவடிக்கைகளை எடுத்து வருகிறது. இந்த நிலையில் இன்று முதல் ஒரு வார காலத்திற்கு தளர்வில்லா முழு ஊரடங்கு அமல்படுத்தப்படும் என்று முதல்-அமைச்சர் மு.க.ஸ்டாலின் அறிவித்தார்.
இந்த நிலையில் நேற்று சிவகங்கை, காரைக்குடி, திருப்பத்தூர், சிங்கம்புணரி, தேவகோட்டை, கல்லல், மானாமதுரை, திருப்புவனம் உள்ளிட்ட நகரங்களில் கடைவீதிகளில் உள்ள அனைத்து கடைகளும் திறக்கப்பட்டன. காய்கறிகள், மளிகை பொருட்கள் வாங்க பொதுமக்கள் கூட்டம் அலைமோதியது.
இந்த நிலையில் காய்கறிகளின் விலை கிடுகிடு உயர்வால் நடுத்தர மக்கள் மிகவும் அவதிப்பட்டனர். சிவகங்கையில் 20 ரூபாய்க்கு விற்ற ஒரு கிலோ தக்காளி ரூ.50-க்கும், காரைக்குடியில் கிலோ ரூ.70-க்கும், மானாமதுரையில் கிலோ ரூ.100-க்கும் விற்பனையானது. அனைத்து காய்கறிகளும் பன்மடங்கு அதிகமான விலைக்கு விற்கப்பட்டன.
இதனால் பொருட்கள் வாங்க வந்த நடுத்தர, ஏழை மக்கள் மிகவும் அதிர்ச்சி அடைந்தனர். கிலோ கணக்கில் வாங்கி இருப்பு வைத்து கொள்ளலாம் என நினைத்தவர்கள் கால் கிலோ, அரைக்கிலோ என்று வாங்கி சென்றனர். முழு ஊரடங்கை காரணம் காண்பித்து அதிக விலைக்கு காய்கறிகளை வியாபாரிகள் விற்பதாக பொதுமக்கள் குற்றம் சாட்டினார்கள். காரைக்குடி அண்ணா தினசரி மார்க்கெட், வைரவபுரம் சந்தை உள்ளிட்ட பகுதிகளிலும் காய்கறி வாங்க ெபாதுமக்கள் கூட்டம் அலைமோதியது. கல்லுக்கட்டி, செக்காலை உள்ளிட்ட பகுதியில் உள்ள மளிகை கடைகளிலும் சமூக இடைவெளியை பின்பற்றாமல் பொதுமக்கள் பொருட்களை வாங்கினார்கள