கொரோனா தடுப்பூசி முகாம்

அருப்புக்கோட்டை, 

அருப்புக்கோட்டை, சாத்தூர் பகுதிகளில் நடைபெற்ற கொரோனா தடுப்பூசி போடும் முகாமினை அமைச்சர் சாத்தூர் ராமச்சந்திரன் ஆய்வு மேற்கொண்டார். 

அருப்புக்கோட்டை மற்றும் அதன் சுற்றுவட்டார பகுதிகளில் அதிகரித்து வரும் கொரோனா தொற்றை கட்டுப்படுத்த நகராட்சி மற்றும் சுகாதாரத்துறை மூலம் கொரோனா பரிசோதனை மற்றும் தடுப்பூசி போடும் பணி அனைத்து பகுதிகளிலும் தீவிரமாக நடைபெற்று வருகிறது. 

நகராட்சி பகுதிகளில் ஆணையாளர் முகமது சாகுல்ஹமீது தலைமையில் மருத்துவ அலுவலர் கோமதி முன்னிலையில் சுகாதார ஆய்வாளர்கள் கொரோனா தடுப்பு பணியில் தீவிரமாக ஈடுபட்டு வருகின்றனர். ஒன்றிய பகுதிகளில் வட்டார மருத்துவ அலுவலர் சஞ்சய் பாண்டியன் தலைமையில் மருத்துவர் ராஜேஷ் கண்ணன் முன்னிலையில் சுகாதார பணியாளர்கள் நோய்த்தொற்று தடுக்கும் பணியில் தீவிரமாக ஈடுபட்டு வருகின்றனர். 

இந்தநிலையில் புதிய பஸ் நிலையம், பந்தல்குடி அரசு மருத்துவமனையில் கொரோனா தடுப்பூசி போடும் முகாம் நடைபெற்றது. 

இந்த முகாமினை அமைச்சர் சாத்தூர் ராமச்சந்திரன்  ஆய்வு செய்தார். அப்போது மருத்துவர்களிடம் மருந்துகள் மற்றும் மருத்துவ உபகரணங்கள் ஏதேனும் தேவை உள்ளதா? என கேட்டறிந்தார். அப்போது  முன்னாள் நகர்மன்ற தலைவர் சிவப்பிரகாசம், தி.மு.க. நகர செயலாளர் மணி, மாவட்ட இளைஞரணி துணை அமைப்பாளர் பாபுஜி,  முன்னாள் ஒன்றிய குழுத்தலைவர் சுப்பாராஜ், மாவட்ட பொருளாளர் சாகுல் ஹமீது, ஒன்றியதலைவர் சசிகலா பொன்ராஜ், பந்தல்குடி ஊராட்சி மன்ற தலைவர் பாலாஜி பத்திரிநாத், ஒன்றிய செயலாளர் பாலகணேஷ் மற்றும் பலர் கலந்து கொண்டனர்.

சாத்தூர் அருகே நென்மேனி மற்றும் இருக்கன்குடியில் கொரோனா தடுப்பூசி முகாம்களை அமைச்சர் சாத்தூர் ராமச்சந்திரன் தொடங்கி வைத்தார். 

அப்போது அவர் பொதுமக்களிடம் குறைகளை கேட்டறிந்தார். அதனைத்தொடர்ந்து ஆரம்ப சுகாதார நிலையத்திற்கு தடுப்பூசி போட வந்திருந்த பொதுமக்களுக்கு இருக்கன்குடி மாரியம்மன் கோவில் நிர்வாகம் சார்பில் கொண்டு வரப்பட்ட குடிநீர் மற்றும் உணவு பொட்டலத்தை அமைச்சர் சாத்தூர் ராமச்சந்திரன் வழங்கினார். 

அப்போது சாத்தூர் ஆர்.டி.ஓ. புஷ்பா, தாசில்தார் வெங்கடேசன், துணை போலீஸ் சூப்பிரண்டு ராமகிருஷ்ணன், யூனியன் சேர்மன் நிர்மலா கடற்கரைராஜ், தி.மு.க ஒன்றிய செயலாளர்கள் கடற்கரைராஜ், முருகேசன், வட்டார வளர்ச்சி அலுவலர் ரவி, வட்டார மருத்துவ அலுவலர் ராஜ்குமார், இருக்கன்குடி மாரியம்மன் கோவில் நிர்வாக அறங்காவலர் குழு உறுப்பினர் ராமமூர்த்தி, நென்மேனி ஊராட்சி மன்ற தலைவர் வேலம்மாள் சக்திவேல், இருக்கன்குடி ஊராட்சி மன்ற தலைவர் செந்தாமரை, கே.மேட்டுப்பட்டி ஊராட்சி மன்ற தலைவர் முத்து மாரியம்மாள் ஆகியோர் கலந்து கொண்டனர்.

 வெம்பக்கோட்டை ஒன்றியம் ஏழாயிரம் பண்ணையில் நடைபெற்ற  கொரோனா தடுப்பூசி முகாமிற்கு கிழக்கு ஒன்றிய தி.மு.க. செயலாளர் கிருஷ்ணகுமார் தலைமை தாங்கினார். ம.தி.மு.க. கிழக்கு ஒன்றிய செயலாளர் பிச்சைராஜ் முன்னிலை வகித்தார். திமுக கிளை செயலாளர் ராதாகிருஷ்ணன் வரவேற்றார்.  ரகுராமன் எம்.எல்.ஏ. கலந்துகொண்டு தடுப்பூசி முகாமை தொடங்கி வைத்தார். இதில் 150 பேருக்கு தடுப்பூசி போடப்பட்டது.