நடப்பாண்டில் 5,900 மண்மாதிரிகள் சேகரிக்க இலக்கு-வேளாண் இணை இயக்குனர் தகவல்

இது தொடர்பாக சிவகங்கை வேளாண்மை இணை இயக்குனர் வெங்கடேஸ்வரன் விடுத்துள்ள செய்திக்குறிப்பில் கூறியுள்ளதாவது:-
பயிர் வளர்ச்சிக்கு தேவையான 16 வகை சத்துக்கள் மண்ணில் உள்ளன. மண்ணில் உள்ள சத்துகளின் அளவை ஆய்வு செய்து அதன் அடிப்படையில் உரமிடுதல், பயிர் தேர்வு செய்வதன் மூலம் விவசாயிகள் உரசெலவினை குறைத்து அதிக மகசூல் பெறலாம்.
 குறிப்பாக கோடைக்காலங்களில் பயிர் இல்லாத தருணத்தில் மண் மாதிரி எடுத்து பரிசோதனை செய்தல் சிறந்தது. நடப்பாண்டில் சிவகங்கை மாவட்டத்தில் 5,900 மாதிரிகள் சேகரிப்பதற்கு இலக்கு நிர்ணயிக்கப்பட்டு பணிகள் தொடங்கப்பட்டுள்ளது. மண் பரிசோதனைக்கு ரூ.20 கட்டணம் செலுத்திட வேண்டும். எனவே விவசாயிகள் தங்கள் பகுதி வட்டார வேளாண்மை உதவி இயக்குனர்களை தொடர்புக்கொண்டு பயன்பெற கேட்டுக்கொள்ளப்படுகிறார்கள்.
 இவ்வாறு அதில் அவர் கூறியுள்ளார்.