சேலம் மாவட்டத்தில் புதிதாக 1,140 பேருக்கு தொற்று கொரோனாவில் இருந்து 844 பேர் குணமடைந்தனர் பெண்கள் உள்பட 19 பேர் பலி

சேலம்:

சேலம் மாவட்டத்தில் புதிதாக 1,140 பேருக்கு தொற்று ஏற்பட்டுள்ளது. கொரோனாவில் இருந்து 844 பேர் குணமடைந்த நிலையில், பெண்கள் உள்பட 19 பேர் பலியானார்கள்.

சேலம் மாவட்டத்தில் தினமும் ஏராளமானவர்கள் கொரோனாவுக்கு பாதிக்கப்பட்டு வருகின்றனர். நேற்று முன்தினம் கொரோனாவுக்கு 1,157 பேர் பாதிக்கப்பட்டனர். இந்த நிலையில் நேற்று ஒரே நாளில் புதிதாக 1,140 பேருக்கு கொரோனா தொற்று இருந்தது பரிசோதனையில் உறுதி செய்யப்பட்டுள்ளது.

சேலம் மாநகராட்சிக்குட்பட்ட பகுதிகளில் 300 பேர், சங்ககிரியில் 63 பேர், ஓமலூரில் 52 பேர், வீரபாண்டி, எடப்பாடி ஆகிய பகுதிகளில் தலா 51 பேர், சேலம் ஒன்றியத்தில் 48 பேர், காடையாம்பட்டியில் 39 பேர், நங்கவள்ளியில் 36 பேர், அயோத்தியாப்பட்டணத்தில் 33 பேர், பனமரத்துப்பட்டியில் 31 பேர், மகுடஞ்சாவடியில் 30 பேர், தாரமங்கலத்தில் 29 பேர், கெங்கவல்லியில் 27 பேர், மேச்சேரியில் 26 பேர், ஆத்தூரில் 22 பேர், பெத்தநாயக்கன்பாளையத்தில் 20 பேர், கொங்கணாபுரத்தில் 19 பேர், மேட்டூரில் 14 பேர், தலைவாசலில் 13 பேர், கொளத்தூர், ஏற்காடு ஆகிய பகுதிகளில் தலா 11 பேர், வாழப்பாடியில் 10 பேர், நரசிங்கபுரத்தில் 4 பேரும் கொரோனாவால் பாதிக்கப்பட்டனர்.

நாமக்கல்லில் இருந்து சேலம் வந்த 41 பேர், ஈரோட்டில் இருந்து வந்த 30 பேர், கரூரில் இருந்து வந்த 29 பேர், சென்னையில் இருந்து சேலம் வந்த 28 பேர், தர்மபுரியில் இருந்து வந்த 26 பேர், திருச்சியில் இருந்து வந்த 25 பேர், கோவையில் இருந்து வந்த 21 பேருக்கும் கொரோனா தொற்று ஏற்பட்டுள்ளது.

கொரோனாவால் பாதிக்கப்பட்டவர்கள் அனைவரும் மாவட்டத்தில் உள்ள அரசு, தனியார் ஆஸ்பத்திரிகள் மற்றும் கொரோனா சிகிச்சை மையங்கள் ஆகியவற்றில் அனுமதிக்கப்பட்டு சிகிச்சை பெற்று வருகின்றனர். இதன் மூலம் மாவட்டத்தில் கொரோனாவால் பாதிக்கப்பட்டவர்களின் எண்ணிக்கை 66 ஆயிரத்து 764 ஆக அதிகரித்துள்ளது.

ஆஸ்பத்திரிகளில் கொரோனாவுக்கு சிகிச்சை பெற்று வந்த 844 பேர் குணமடைந்துவிட்டதால் அவர்கள் நேற்று டிஸ்சார்ஜ் செய்யப்பட்டனர். தொடர்ந்து 8 ஆயிரத்து 672 பேருக்கு சிகிச்சை அளிக்கப்பட்டு வருகிறது. மாவட்டத்தில் 130-க்கும் மேற்பட்ட இடங்கள் கட்டுப்படுத்தப்பட்ட பகுதிகளாக அறிவிக்கப்பட்டுள்ளது. அந்த பகுதிகளில் உள்ள வீடுகளில் வசிக்கும் 23 ஆயிரத்து 217 பேரை சுகாதாரத்துறையினர் கண்காணித்து வருகின்றனர்.

சேலம் மாவட்டத்தில் கடந்த சில நாட்களாக கொரோனாவுக்கு 15-க்கும் மேற்பட்டவர்கள் இறந்து வருகின்றனர். இந்த நிலையில் சேலத்தை சேர்ந்த பெண்கள் உள்பட 19 பேர் கொரோனாவால் பாதிக்கப்பட்டு அரசு மற்றும் தனியார் ஆஸ்பத்திரிகளில் சிகிச்சை பெற்று வந்தனர். அங்கு சிகிச்சை பலனின்றி அவர்கள் பரிதாபமாக இறந்தனர். இவர்கள் உள்பட மாவட்டத்தில் கொரோனாவுக்கு பலியானவர்களின் எண்ணிக்கை 988 ஆக அதிகரித்துள்ளது.