ஷீல்டு கால்வாயை சீரமைக்க வேண்டும்-விவசாயிகள் கோரிக்கை

 பாசன திட்டம்
சிவகங்கை மாவட்டத்தில் சிவகங்கை, திருப்பத்தூர், சிங்கம்புணரி உள்ளிட்ட தாலுகாக்களில் 6 ஆயிரத்து 38 ஏக்கர் நிலம் பெரியாறு வைகை பாசன திட்டத்தில் பாசனவசதி பெறுகின்றன. இதற்காக ஷீல்டு கால்வாய், லெசிஸ் கால்வாய், 48-ம் மடை, கட்டாணிப்பட்டி1,2 ஆகிய 5 கால்வாய்கள் அமைக்கப்பட்டுள்ளன..இதில் ஷீல்டு கால்வாய் 1925-ல் மண் கால்வாயாக 7 கி.மீ. தூரம் அமைக்கப்பட்டுள்ளது. இந்த கால்வாய் ஆங்கிலேயர் காலத்தில் அமைக்கப்பட்டது.
மேலும் இது அகலமான மண் கால்வாய் என்பதால் நீர்உறிஞ்சப்பட்டு முழுமையான பயன் விவசாயிகளுக்கு கிடைப்பதில்லை. இந்த கால்வாயை சீரமைக்க கோரி இப்பகுதி விவசாயிகள் தொடர்ந்து வலியுறுத்தி வந்தனர். இதன் காரணமாக 2018-ல் 110 விதியின் கீழ் 22 கோடி ரூபாய் மதிப்பீட்டில் கான்கிரீட் கால்வாயாக மாற்றம் செய்யப்படும், என அறிவிக்கப்பட்டது. அதற்கான நிதியும் ஒதுக்கீடு செய்யப்பட்டது. இன்று வரை ஷீல்டு கால்வாய் புனரமைப்பு பணிகள் செய்யப்படவில்லை. இதனால் கால்வாயில் திறக்கப்படும் நீர் முழுமையாக பயன்படுத்த முடியாத நிலை உள்ளது.
தற்போதைய புதிய அரசு ஷீல்டு கால்வாய் பிரச்சினையில் கவனம் செலுத்தி பணிகளை உடனடியாக தொடங்க வேண்டும். இந்த ஆண்டு பாசன காலத்திலாவது பயன்பாட்டுக்கு கொண்டு வர வேண்டும் என இந்த பகுதி விவசாயிகள் கோரிக்கை விடுத்துள்ளனர்.