பெற்ற குழந்தையை அனாதை என அரசு ஆஸ்பத்திரியில் ஒப்படைத்த மதுரை வாலிபர்

சிவகங்கை மாவட்டம் மானாமதுரை அருகே உள்ள இடைக்காட்டூருக்கு காரில் சென்ற போது வழியில் திருப்பாச்சேத்தி சாலையோரத்தில் 6 மாத பெண் குழந்தை அனாதையாக கிடந்தது எனக் கூறி 2 வாலிபர்கள் கடந்த 11-ந்தேதி சிவகங்கை அரசு மருத்துவக்கல்லூரி மருத்துவமனையில் ஒப்படைத்தனர்.
விசாரணையில், அந்த குழந்தையின் தந்தையான மதுரை மாவட்டம் உசிலம்பட்டி அருகேயுள்ள எருமாரப்பட்டி கிராமத்தை சேர்ந்த ஆனந்த் என்ற ஆனந்தகுமார் (வயது 35) என்பவரே அந்த குழந்தையை வளர்க்க விருப்பமில்லாமல் அனாதை எனக் கூறி நாடகமாடி மருத்துவமனையில் ஒப்படைத்தது தெரியவந்தது.
இதைத்தொடர்ந்து போலீசார் குழந்தையின் தந்தை ஆனந்தகுமார், தாத்தா பெரியசாமி, உறவினர்கள் தர்ம பாண்டி, செல்வம் ஆகியோர் மீது வழக்கு பதிவு செய்தனர். இந்தவழக்கில் குழந்தையின் தந்தை ஆனந்தகுமார் (23) உறவினர் தர்மபாண்டி (25) 2 பேரை கைது செய்தனர். தலைமறைவாகி விட்ட பெரியசாமி, செல்வம் இருவரையும் போலீசார் தேடி வருகின்றனர்.
இதற்கிடையில் அந்த குழந்தையை மதுரையிலுள்ள ஒரு மையத்தில் பராமரிப்புக்காக அதிகாரிகள் ஒப்படைத்துள்ளனர்.