கர்நாடகாவில் இருந்து நாமக்கல்லுக்கு காரில் கடத்தல்:206 மதுபாட்டில்கள் பறிமுதல்-அண்ணன், தம்பி கைது

நாமக்கல்:

நாமக்கல் மாவட்டத்தில் கொரோனா பரவல் அதிகமாக இருப்பதால், இங்கு இதுவரை டாஸ்மாக் கடைகள் திறக்கப்படவில்லை. எனவே யாராவது வெளிமாநிலம் மற்றும் வெளி மாவட்டங்களில் இருந்து மதுபாட்டில்களை கடத்தி வந்து கூடுதல் விலைக்கு விற்பனை செய்கிறார்களா? என போலீசார் இரவு, பகலாக கண்காணித்து வருகின்றனர்.

நாமக்கல் முதலைப்பட்டி பகுதியில் லாரி பாடி கட்டும் பட்டறை ஒன்றின் முன்பு சந்தேகப்படும்படியாக கார் ஒன்று நிறுத்தப்பட்டு இருப்பதாக நல்லிபாளையம் போலீசாருக்கு ரகசிய தகவல் கிடைத்தது. இதையடுத்து இன்ஸ்பெக்டர் சண்முகவேல்பாண்டியன், சப்-இன்ஸ்பெக்டர் சின்னத்துரை மற்றும் போலீசார் அங்கு சென்று காரை சோதனை செய்தனர்.

இந்த சோதனையின்போது அந்த காரில் கர்நாடக மாநில மதுபாட்டில்களை கடத்தி வந்து, அடுக்கி வைக்கப்பட்டு இருப்பது தெரியவந்தது. இதையடுத்து காரில் இருந்த 206 மதுபாட்டில்களை போலீசார் பறிமுதல் செய்தனர். காரும் பறிமுதல் செய்யப்பட்டது.

இது தொடர்பாக போலீசார் விசாரணை நடத்திய போது நாமக்கல் என்.ஜி.ஜி.ஓ. காலனியை சேர்ந்த கதிர்வேல் (வயது 38), இவருடைய அண்ணன் சதாசிவம் (40) ஆகிய இருவரும் கர்நாடக மாநிலத்தில் இருந்து மதுபாட்டில்களை கடத்தி வந்து, நாமக்கல் பகுதியில் அதிக விலைக்கு விற்பனை செய்ய திட்டமிட்டு இருந்தது தெரியவந்தது. இதையடுத்து கதிர்வேல், சதாசிவம் ஆகிய இருவரையும் போலீசார் கைது செய்தனர்.

மேலும் போலீசாரை கண்டதும் தப்பி ஓடிய கார் டிரைவர் மணி என்பவரை போலீசார் தேடி வருகின்றனர்.