சிங்கம்புணரி, எஸ்.புதூர் பகுதியில் பலத்த மழை

சிங்கம்புணரி பகுதியில் நேற்று மாலை வானம் கருமேகக்கூட்டத்துடன் காணப்பட்டது. இந்த நிலையில் நேற்று மாலை 6.30 மணிக்கு பலத்த காற்றுடன் மழை பெய்ய தொடங்கியது.  சிங்கம்புணரியை ஒட்டியுள்ள பிரான்மலை, அணைக்கரைப்பட்டி, காளாப்பூர், மங்கலம் உள்ளிட்ட பகுதிகளிலும் 1 மணி நேரம் பலத்த மழை பெய்தது.
தொடர்ந்து பலத்த காற்று வீசியதால் பல இடங்களில் தென்னை மரங்கள், மின்கம்பங்கள் சாய்ந்தன. சிங்கம்புணரி மாதவன் நகரில் தென்னை மரம் சாய்ந்து அருகே உள்ள குடியிருப்பு பகுதிக்குள் விழுந்தது. நல்லவேளை வீட்டின் மீது மரம் விழாததால் அங்கு வசித்து வருபவர்கள் அதிர்ஷ்டவசமாக உயிர் தப்பினர்.
எஸ்.புதூர் மற்றும் சுற்றுவட்டார பகுதிகளான புழுதிபட்டி, செட்டிகுறிச்சி, பிரான்பட்டி, குன்னத்தூர், தர்மபட்டி ஆகிய பகுதிகளில் நீண்ட நாட்களுக்கு பிறகு நேற்று இரவு இடி, மின்னலுடன் கூடிய பலத்த மழை பெய்தது. இதனால் விவசாயிகள் மகிழ்ச்சி அடைந்தனர். பகலில் வெயிலின் தாக்கம் இருந்து வந்த நிலையில், இரவில் பெய்த மழையால் அப்பகுதி குளிர்ந்து காணப்பட்டது.