பெங்களூருவில் இருந்து நாமக்கல்லுக்கு லாரியில் மதுபாட்டில்கள் கடத்தல்; டிரைவர் கைது

வெண்ணந்தூர்:

வெண்ணந்தூர் அருகே நாமக்கல்-சேலம் தேசிய நெடுஞ்சாலையில் மதுபாட்டில்களை கடத்தி வருபவர்களை கண்காணிக்க சோதனைச்சாவடி அமைக்கப்பட்டுள்ளது. இதில் 24 மணி நேரமும் வெண்ணந்தூர் போலீசார் சுழற்சி முறையில் வாகன சோதனையில் ஈடுபட்டு வருகிறார்கள். இந்தநிலையில் நேற்று அதிகாலை அந்த வழியாக வந்த முட்டை லாரியை போலீசார் நிறுத்தி சோதனை செய்தனர். அதில் 48 மதுபாட்டில்கள் மறைத்து வைத்து, கடத்தி வருவது கண்டுபிடிக்கப்பட்டது. இதையடுத்து போலீசார் லாரி டிரைவரிடம் விசாரித்த போது, அவர் ஏழூர் பகுதியை சேர்ந்த சேகர் (வயது 40) என்பதும், பெங்களூருவில் இருந்து மதுபாட்டில்களை கடத்தி வருவதும் கண்டுபிடிக்கப்பட்டது. இதையடுத்து போலீசார் வழக்குப்பதிவு செய்து சேகரை கைது செய்தனர். மேலும் 48 மதுபாட்டில்கள் பறிமுதல் செய்யப்பட்டன.