கீழடி அருங்காட்சியக கட்டுமான பணிகள்-4 அமைச்சர்கள் ஆய்வு

சிவகங்கை மாவட்டம் கீழடியில் 7-ம் கட்ட அகழ்வாராய்ச்சி பணிகள் நடைபெற்று வருகின்றன. கொந்தகை ஊராட்சியில் தொல்பொருட்களுக்கான அருங்காட்சியக கட்டுமான பணியும் நடந்து வருகிறது.
இந்த பணிகளை பொதுப்பணித்துறை அமைச்சர் எ.வ.வேலு, ஊரக வளர்ச்சித்துறை அமைச்சர் கே.ஆர்.பெரியகருப்பன், வணிகவரித்துறை அமைச்சர் மூர்த்தி, நிதி அமைச்சர் பழனிவேல் தியாகராஜன் ஆகியோர் நேற்று ஆய்வு செய்தனர். கீழடி அகழாய்வில் இதுவரை கண்டெடுக்கப்பட்ட பொருட்களையும் பார்வையிட்டனர்.
 இந்தியாவில் பல்வேறு மாநிலங்களில் அகழ்வாராய்ச்சி மேற்கொள்ளப்பட்டு வருகிறது. இருப்பினும் தமிழகத்தில் கீழடியில் மேற்கொள்ளப்படும் அகழ்வாராய்ச்சியின் மூலம் சிந்து சமவெளி நாகரிகம், மொகஞ்சதாரோ, ஹரப்பா காலத்திற்கு முன்பே தமிழன் எத்தகைய நாகரிகத்துடனும், கலாசாரத்துடனும் வாழ்ந்து இருக்கிறான் என்பதை அறிய முடிகிறது. இதன் மூலம் உலக அளவில் தமிழர்கள் தலைநிமிர காரணமான இடமாக கீழடி விளங்குகின்றது.
அகழாய்வில் கிடைத்த பொருட்களை அறிஞர்கள், சான்றோர்கள், வல்லுனர்கள், மாணவ-மாணவியர் என அனைவரும் பார்த்து, தொன்மை வாய்ந்த நாகரிகத்தை தெரிந்து கொள்ளும் வகையில் கொந்தகை பகுதியில் ரூ.12 கோடி 21 லட்சம் மதிப்பீட்டில் உலகத்தரம் வாய்ந்த அகழ்வாராய்ச்சி அருங்காட்சியகம் கட்டும் பணி கடந்த 6-10-2020 அன்று அன்றைய ஆட்சியாளர்களால் தொடங்கப்பட்டது. இந்த பணி வருகிற அக்டோபர் மாதத்திற்குள் முடிக்கப்படவேண்டும். ஆனால் வெறும் 17 சதவீத பணியே முடிக்கப்பட்டு உள்ளது.
இந்த பணியின் காலதாமதம் குறித்து அறிந்த முதல்-அமைச்சர் மு.க.ஸ்டாலின், எங்களை அழைத்து நேரில் சென்று பணிகளை விரைவுபடுத்த உத்தரவிட்டார். அதன்படி இங்கு ஆய்வுக்கு வந்து உள்ளோம். இந்த அருங்காட்சியக பணிகள் விரைந்து முடிக்க நடவடிக்கை எடுக்கப்பட்டு உள்ளது.
 மேலும் அருங்காட்சியக பணிகள் முடிக்கப்பட்ட உடன் சுற்றுலா பயணிகள், மாணவ-மாணவியர்கள், பொதுமக்கள் எளிதாக வந்து செல்லும் வகையில் கீழடி பகுதியில் புதிதாக சாலைகள், தேவையான உட்கட்டமைப்பு வசதிகள் மாவட்ட நிர்வாகத்தின் மூலம் செய்து கொடுக்கப்படும்.
இவ்வாறு அவர் கூறினார்.