தொப்பூர் கணவாயில் கார் மீது மோதிய லாரி கவிழ்ந்தது டிரைவர்கள் உள்பட 7 பேர் காயம்

நல்லம்பள்ளி:

மராட்டிய மாநிலத்தில் இருந்து வெங்காய பாரம் ஏற்றிக்கொண்டு, ஒரு லாரி தர்மபுரி மாவட்டம் தொப்பூர் கணவாய் வழியாக திருநெல்வேலிக்கு நேற்று வந்து கொண்டு இருந்தது. இந்த லாரியை நாமக்கல் மாவட்டத்தை சேர்ந்த செல்வகணபதி (வயது 35) என்பவர் ஓட்டி வந்தார். தொப்பூர் கணவாய் அருகே வந்தபோது டிரைவரின் கட்டுப்பாட்டை இழந்த லாரி சாலையில் தாறுமாறாக ஓடி முன்னால் சென்ற கார் மீது மோதி கவிழ்ந்தது.

இந்த விபத்தில் கார் நொறுங்கி சேதமடைந்தது. மேலும் காரில் வந்த ஓசூர் முனிஷ் நகரை சேர்ந்த குப்புசாமி (35), உமாசங்கர் (43), டிரைவர் செல்வராஜ் (25), சுந்தர்ராஜன் (40), மணிகண்டன் (42), பிரவீன் (27) மற்றும் லாரி டிரைவர் செல்வகணபதி ஆகிய 7 பேர் இடிபாடுகளில் சிக்கி காயமடைந்தனர். இந்த விபத்து குறித்து தொப்பூர் போலீஸ் நிலையத்திற்கும், சுங்கச்சாவடி ரோந்து படையினருக்கும் தகவல் தெரிவிக்கப்பட்டது. 

அதன்பேரில் அவர்கள் விரைந்து வந்து விபத்தில் சிக்கிய 7 பேரையும் மீட்டு சிகிச்சைக்காக தர்மபுரி அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த விபத்து காரணமாக தர்மபுரி-சேலம் தேசிய நெடுஞ்சாலையில் 3 மணி நேரம் போக்குவரத்து பாதிக்கப்பட்டது. 

இதையடுத்து போலீசார் மற்றும் சுங்கச்சாவடி ரோந்து படையினர் கிரேன் மூலம் லாரி மற்றும் வெங்காய மூட்டைகள், கார் ஆகியவற்றை அப்புறப்படுத்தி போக்குவரத்தை சீரமைத்தனர். இந்த விபத்து குறித்து தொப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.