ஆடு மேய்த்த மூதாட்டியை தாக்கி நகை, பணம் கொள்ளை

விழுப்புரம், 

விழுப்புரம் மாவட்டம் வானூரை அடுத்த காசிப்பாளையத்தை சேர்ந்தவர் ராமகிருஷ்ணன் மனைவி இந்திரா (வயது 65). இவர் நேற்று முன்தினம் மாலை வழக்கம்போல் தனது வீட்டின் அருகே உள்ள தாமரைக்குளத்தின் பின்புற பகுதியில் ஆடுகளை மேய்த்துக் கொண்டிருந்தார்.

ஆனால் மாலை வெகு நேரமாகியும் இந்திரா வீடு திரும்பாததால் அவரது குடும்பத்தினர், அவரை தேடிச்சென்றனர். அப்போது அங்குள்ள முட்புதரில் இந்திரா படுகாயங்களுடன் உயிருக்கு போராடிக்கொண்டிருந்தார். அவர் அருகிலேயே சாப்பாடு எடுத்துச்சென்ற பாத்திரங்கள் சிதறிக்கிடந்தன. இதை பார்த்து அதிர்ச்சியடைந்த அவர்கள், உடனடியாக இந்திராவை மீட்டு சிகிச்சைக்காக புதுச்சேரி ஜிப்மர் மருத்துவமனையில் சேர்த்தனர்.

இதுகுறித்த தகவல் அறிந்ததும் வானூர் போலீசார் அங்கு விரைந்து வந்து விசாரணை நடத்தினர். விசாரணையில் யாரோ மர்ம நபர்கள், இந்திராவை தாக்கி அவர் அணிந்திருந்த அரை கிராம் மூக்குத்தி மற்றும் புடவையில் முடிந்து வைத்திருந்த பணத்தையும் கொள்ளையடித்துச் சென்றிருப்பது தெரியவந்தது. தொடர்ந்து, போலீசார் வழக்குப்பதிவு செய்து மர்ம நபர்களை வலைவீசி தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.