தாரமங்கலம் அருகே மோட்டார் சைக்கிள் மீது கார் மோதியதில் வாலிபர் பலி-நண்பர்கள் படுகாயம்

தாரமங்கலம்:

தாரமங்கலம் அருகே மோட்டார் சைக்கிள் மீது கார் மோதியதில் வாலிபர் பலியானார். மேலும், நண்பர்கள் 2 பேர் படுகாயம் அடைந்தனர். 

மேச்சேரி அருகே உள்ள நங்கவள்ளி கிழக்கு ரத வீதியை சேர்ந்தவர் செல்வம். இவருடைய மகன் பாஸ்கர் (வயது 21). தாரமங்கலம் அருகே உள்ள பெரியசோரகை பகுதியை சேர்ந்த பொன்னுசாமி மகன் சந்தோஷ் (21), வெங்கடேஷ் மகன் பிரவீன் (21). இவர்கள் 3 பேரும் நண்பர்கள் ஆவர்.

நேற்று நண்பர்கள் 3 பேரும் ஒரு மோட்டார் சைக்கிளில் தாரமங்கலம் வந்தனர். பின்னர் அங்கிருந்து நங்கவள்ளிக்கு திரும்பி கொண்டிருந்தனர். வழியில் தாரமங்கலம் அருகே பைப்பூர் என்ற இடத்தில் நங்கவள்ளியில் இருந்து எதிரே வேகமாக வந்த கார், மோட்டார் சைக்கிள் மீது மோதியது.

இந்த விபத்தில் நண்பர்கள் 3 பேரும் சாலையில் தூக்கி வீசப்பட்டு படுகாயம் அடைந்தனர். இதனைப்பார்த்து அதிர்ச்சி அடைந்த அந்த வழியாக சென்றவர்கள் 3 பேரையும் மீட்டு, சிகிச்சைக்காக சேலம் அரசு ஆஸ்பத்திரிக்கு அனுப்பி வைத்தனர். ஆனால் செல்லும் வழியிலேயே வாலிபர் பாஸ்கர் பரிதாபமாக இறந்தார். சந்தோஷ், பிரவீனுக்கு ஆஸ்பத்திரியில் திவீர சிகிச்சை அளிக்கப்பட்டு வருகிறது. 

இதுகுறித்து தகவல் அறிந்த தாரமங்கலம் போலீஸ் சப்-இன்ஸ்பெக்டர் சிவகுமார் மற்றும் போலீசார் அரசு ஆஸ்பத்திரிக்கு சென்று பாஸ்கர் உடலை கைப்பற்றி பிரேத பரிசோதனைக்கு அனுப்பி வைத்தனர். மேலும் விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகிறார்கள்.