நாகலாந்தில் நடந்த விபத்தில் மரணம் அடைந்த பெலகாவி ராணுவ வீரர் உடல் சொந்த ஊரில் அடக்கம்

பெலகாவி: நாகலாந்தில் நடந்த சாலை விபத்தில் மரணம் அடைந்த, பெலகாவி ராணுவ வீரர் உடல் அவரது சொந்த ஊரில் நேற்று அரசு மரியாதையுடன் அடக்கம் செய்யப்பட்டது.

பெலகாவி மாவட்டம் கோகாக் தாலுகா சிவப்புரா கிராமத்தை சேர்ந்தவர் மஞ்சுநாத் (வயது 38). இவர் கடந்த 18 ஆண்டுகளாக ராணுவத்தில் பணியாற்றினார். கடந்த 4 ஆண்டுகளாக அவர் நாகலாந்து மாநிலத்தில் ராணுவத்தில் ஜீப் டிரைவராக பணியாற்றி வந்தார். கடந்த சில தினங்களுக்கு முன்பு பணியின் போது வனப்பகுதிக்குள் ஜீப் கவிழ்ந்து விபத்துக்குள்ளானதில் மஞ்சுநாத் உயிரிழந்தார். இதுபற்றி சிவப்புராவில் வசிக்கும் அவரது குடும்பத்தினருக்கு ராணுவ அதிகாரிகள் தகவல் கொடுத்து இருந்தனர்.

இதைக்கேட்டு மஞ்சுநாத்தின் குடும்பத்தினர் கதறி அழுதனர். மேலும் மஞ்சுநாத் உயிரிழந்த சம்பவம் பற்றி அறிந்ததும் சிவப்புரா கிராமமே சோகத்தில் மூழ்கியது. இந்த நிலையில் மஞ்சுநாத்தின் உடல் கோவா வழியாக பெலகாவிக்கு அனுப்பி வைக்கப்படும் என்று அறிவிக்கப்பட்டு இருந்தது. அதன்படி நேற்று மஞ்சுநாத்தின் உடல் விமானம் மூலம் கோவாவுக்கு அனுப்பி வைக்கப்பட்டது. அங்கிருந்து ராணுவ வாகனத்தில் மஞ்சுநாத்தின் உடல் சிவப்புராவுக்கு கொண்டு வரப்பட்டது.

சிவப்புரா கிராமத்திற்கு வந்த மஞ்சுநாத்தின் உடலை பார்த்து அவரது குடும்பத்தினர், உறவினர்கள், கிராம மக்கள் கதறி அழுதனர். பின்னர் பொதுமக்கள் இறுதி அஞ்சலிக்காக மஞ்சுநாத் உடல் வைக்கப்பட்டது. இதில் சிவப்புரா மற்றும் அதனை சுற்றியுள்ள பகுதிகளை சேர்ந்த கிராம மக்கள் கலந்து கொண்டு மஞ்சுநாத்தின் உடலுக்கு அஞ்சலி செலுத்தினர். மேலும் மங்களா அங்கடி எம்.பி.யும் மஞ்சுநாத்தின் உடலுக்கு அஞ்சலி செலுத்தினார்.

அப்போது மஞ்சுநாத்தின் உடல் வைக்கப்பட்டு இருந்த கண்ணாடி பேழையின் மீது தேசிய கொடி போர்த்தப்பட்டு இருந்தது. பின்னர் அலங்கரிக்கப்பட்ட வாகனத்தில், மயானத்திற்கு எடுத்து செல்லப்பட்ட மஞ்சுநாத்தின் உடலுக்கு ராணுவ வீரர்கள் இறுதி மரியாதை செலுத்தினர். பின்னர் துப்பாக்கி குண்டுகள் முழங்க அரசு மரியாதையுடன் மஞ்சுநாத்தின் உடல் அடக்கம் செய்யப்பட்டது.

நாகலாந்தில் நடந்த விபத்தில் உயிரிழந்த ராணுவ வீரர் மஞ்சுநாத்தின் உடல் நேற்று அவரது சொந்த ஊரில் அடக்கம் செய்யப்பட்டது. முன்னதாக மஞ்சுநாத்தின் உடல் சிவப்புரா கிராமத்திற்கு வந்த போது மஞ்சுநாத்தின் 5 வயது மகன் ஸ்வரூப், ராணுவ சீருடை அணிந்து தந்தையின் உடலை வரவேற்றான். பின்னர் மஞ்சுநாத்தின் உடல் அடக்கம் செய்வதற்கு முன்பு ஸ்வரூப் ராணுவ சீருடையில் வந்து தந்தையின் உடலுக்கு மலர்வளையம் வைத்து அஞ்சலி செலுத்தினான். இந்த காட்சி ராணுவ வீரர்கள், கிராம மக்களை கண்கலங்க வைத்தது.