மானியத்தில் இருசக்கர வாகனம் பெற உலமாக்கள் விண்ணப்பிக்கலாம்

சிவகங்கை மாவட்ட கலெக்டர் மதுசூதன் ரெட்டி, விடுத்துள்ள செய்திக் குறிப்பில் கூறியுள்ளதாவது:-
தமிழ்நாடு வக்பு வாரியத்தில் பதிவு செய்யப்பட்டு, சிவகங்கையில் உள்ள வக்பு நிறுவனங்களில் பணியாற்றும் உலமாக்கள் தங்கள் பணியை சிறப்பாக செயல்படுத்துவதற்கு ஏதுவாக புதிய இருசக்கர வாகனங்கள் வாங்க மானியம் வழங்கும் திட்டம் செயல்படுத்தப்பட உள்ளது.
விண்ணப்பதாரர் தமிழ்நாட்டில் வக்பு வாரியத்தில் பதிவு செய்யப்பட்டு சிவகங்கை மாவட்டத்தில் உள்ள வக்பு நிறுவனங்களில் விண்ணப்பிக்கும் நாளில் குறைந்தபட்சம் 5 ஆண்டுகள் பணியாற்றி இருக்க வேண்டும், தமிழ்நாட்டை சேர்ந்தவராக இருத்தல் வேண்டும், 18 வயதில் இருந்து 40 வயதிற்கு உட்பட்டவராக இருத்தல் வேண்டும்.
விண்ணப்பத்துடன் ஆதார்அட்டை, வாக்காளர் அடையாள அட்டை, குடும்ப அட்டை, வருமான சான்று, வயது சான்றிதழ், புகைப்படம், சாதி சான்று, புகைப்படம் மாற்றுத்திறனாளியாக இருப்பின் உரிய அலுவ லரிடம் பெறப்பட்ட சான்று, ஓட்டுனர் உரிமம், கல்வித் தகுதி சான்றிதழ், குறைந்தபட்சம் 8-வது தேர்ச்சி, தோல்வி, வங்கி கணக்கு எண் மற்றும் வங்கி கணக்கு புத்தகத்தின் முதல் பக்கம் நகல்,  வக்புவில் பணிபுரியும் சான்று பெற்று மாவட்ட வக்பு கண்காணிப்பாளர் மேலொப்பத்துடன் கொடுக்க வேண்டும்.
 வாகனம் வாங்குவதற்கான விலைப்பட்டியல், விலைப்புள்ளி ஆகியவை இணைக்கப்பட வேண்டும். மேலும், மானிய விலையில் இருசக்கர வாகனம் வாங்க தேவையான படிவத்தினை சிவகங்கை கலெக்டர் அலுவலகம் அமைந்துள்ள மாவட்ட பிற்படுத்தப்பட்டோர் நல அலுவலகத்தில் நேரில் பெற்றுக்கொள்ளலாம்,
இவ்வாறு அதில் கூறப்பட்டு உள்ளது.