மக்கள் நீதிமன்றத்தில் வழக்கு தொடர்வது எப்படி?-நீதிபதி கருணாநிதி தகவல்

இது தொடர்பாக சிவகங்கை மாவட்ட நிரந்தர மக்கள் நீதி மன்றத்தின் தலைவர் நீதிபதி கருணாநிதி நிருபர்களுக்கு அளித்த பேட்டியில் கூறியதாவது:-
சட்டப்பணிகள் ஆணைக்குழுவின் ஒரு அங்கமாக இருந்து வந்த மக்கள் நீதிமன்றத்தை உயர் நீதிமன்றம் தனியாக பிரித்து நிரந்தர மக்கள் நீதிமன்றம் செயல்பட உத்தரவிட்டுள்ளது. இதன் அடிப்படையில் தற்போது சிவகங்கை மாவட்டத்தில் இந்த நிரந்தர மக்கள் நீதிமன்றம் செயல்படுகிறது.
 மனுக்களின் எண்ணிக்கையை பொறுத்து வாரம் ஒரு முறை இந்த நீதிமன்றம் கூடி இருதரப்பினருக்கும் சமரசமான உடன்பாட்டை ஏற்படுத்த நடவடிக்கை எடுப்பார்கள். இதனால் நீதிமன்ற வழக்குகளில் தீர்ப்புக்காக நீண்ட காலம் காத்திருக்க வேண்டும் என்ற அவசியம் இருக்காது. இந்த நீதிமன்ற உத்தரவிற்கு மேல்முறையீடு செய்ய முடியாது. தேவையானால் உயர் நீதிமன்றத்தில் மனு தாக்கல் செய்யலாம். இங்கு புகார் செய்பவர்களுக்கு வக்கீல் வைக்க வேண்டும் என்ற கட்டாயம் கிடையாது.மேலும் நீதிமன்ற கட்டணம் எதுவும் செலுத்த வேண்டியதில்லை.
 ‌நிரந்தர மக்கள் நீதிமன்ற தலைவர் மற்றும் உறுப்பினர்கள் முன்னிலையில் இரு தரப்பினரும் நேரடியாக பேசி சமாதானம் ஏற்படுத்திக் கொள்ளலாம். சிவகங்கை மாவட்டத்தில் இந்த நீதிமன்றத்திற்கு 50-க்கும் மேற்பட்ட வழக்குகள் வந்தன. இதில் தற்போது 15 வழக்குகள் மட்டுமே விசாரணையில் உள்ளது. மற்றவர்களுக்கு சமரச தீர்வு காணப்பட்டுள்ளது.
 எனவே சிவகங்கை மாவட்டத்தை சேர்ந்த பொதுமக்கள் பொது பயன்பாட்டு சேவை சம்பந்தமான பிரச்சினைகளுக்கு நிரந்தர மக்கள் நீதிமன்றத்தை அணுகி தீர்வு காணலாம்.
 இவ்வாறு அவர் கூறினார்.