போடி அருகே பரபரப்பு ரூ.3 கோடியே 50 லட்சம் கேட்டு அரசு ஊழியரின் கணவர் காரில் கடத்தல் 2 பேர் கைது 5 பேருக்கு வலைவீச்சு

============

போடி அருகே பொட்டல்களம் கிராமத்தை சேர்ந்த கவுர்மோகன்தாஸ் என்பவரை நேற்று முன்தினம் ஒரு கும்பல் ரூ.3½ கோடி கேட்டு கடத்திச் சென்றது. இந்த சம்பவம் தொடர்பாக திண்டுக்கல் சரக போலீஸ் டி.ஐ.ஜி. விஜயகுமாரி, தேனி மாவட்ட போலீஸ் சூப்பிரண்டு அலுவலகத்தில் நேற்று நிருபர்களுக்கு பேட்டி அளித்தார். அப்போது அவர் கூறியதாவது:-

கவுர்மோகன்தாஸ் கடத்தப்பட்டது குறித்து அவருடைய மனைவி போடி தாலுகா போலீஸ் நிலையத்தில் நேற்று முன்தினம் இரவு 10.30 மணியளவில் புகார் கொடுத்தார். உடனடியாக 5 தனிப்படைகள் அமைக்கப்பட்டு தேடுதல் வேட்டை நடத்தப்பட்டது. தனிப்படையினரின் துரிதமான முயற்சியால் கடத்தப்பட்ட 12 மணி நேரத்துக்குள் கடத்தப்பட்ட நபர் மீட்கப்பட்டார். கடத்தலில் ஈடுபட்ட 2 பேர் கைது செய்யப்பட்டனர். மற்றவர்களை தேடி வருகிறோம்.

கவுர்மோகன்தாசுக்கு ஏற்கனவே அறிமுகம் ஆன நபர்கள் தான் கடத்தலில் ஈடுபட்டுள்ளனர். பணம் கொடுக்கல், வாங்கல் தொடர்பான பிரச்சினையில் இந்த கடத்தல் நடந்துள்ளதாக முதல்கட்ட விசாரணையில் தெரியவந்துள்ளது. கடத்தலில் ஈடுபட்ட நபர்களில் ஒருவர், சில ஆண்டுகளுக்கு முன்பு கவுர்மோகன்தாசிடம் பணம் கொடுத்து ஏமாற்றம் அடைந்ததாக கூறப்படுகிறது. முழுமையான விசாரணையில் தான் கூடுதல் விவரங்கள் தெரியவரும்.

பணம் கொடுக்கல், வாங்கல் பிரச்சினை இருந்தால் உடனடியாக போலீஸ் நிலையத்தை தான் அணுக வேண்டும். தன்னிச்சையாக யாரும் இதுபோன்ற ஆள்கடத்தலில் ஈடுபடக்கூடாது. அவ்வாறு ஈடுபடுவது சட்டப்படி குற்றம். கடத்தப்பட்ட கவுர்மோகன்தாஸ் மீதும் 5 மோசடி மற்றும் குற்ற வழக்குகள் கோர்ட்டில் நடந்து வருகின்றன.

இவ்வாறு அவர் கூறினார்.

பேட்டியின் போது மாவட்ட போலீஸ் சூப்பிரண்டு பிரவீன் உமேஷ் டோங்கரே, மாவட்ட குற்றப்பிரிவு போலீஸ் துணை சூப்பிரண்டு சுந்தர்ராஜ் ஆகியோர் உடன் இருந்தனர்.

=======

சம்பவ இடத்தில் உள்ள கண்காணிப்பு கேமராவில் ஒரு சிவப்பு நிற காரில் கவுர்மோகன்தாசை கடத்தி செல்லும் காட்சி பதிவாகி இருந்தது. ஆனால், அந்த கார் பதிவு எண் மற்றும் காரின் முழு உருவம் வீடியோவில் பதிவாகவில்லை. சிவப்பு நிற கார் என்ற அடையாளத்தை வைத்து மாவட்டத்தில் உள்ள சோதனை சாவடிகளில் உள்ள கேமராக்களில் பதிவான காட்சிகளை போலீசார் ஆய்வு செய்தனர். இதில், ஆண்டிப்பட்டி கணவாய் சோதனை சாவடியில் மட்டும் நேற்று முன்தினம் இரவில் அதே மாதிரியான 17 கார்கள் கடந்து சென்றது தெரியவந்தது. இதனால், கடத்தல்காரர்கள் பயன்படுத்திய கார் எது என்பதை கண்டுபிடிப்பதில் சிக்கல் ஏற்பட்டது. அப்போது சம்பவ இடத்தில் அரைகுறையாக பதிவாகி இருந்த காரின் புகைப்படத்தை மாவட்ட போலீஸ் சூப்பிரண்டு பிரவீன் உமேஷ் டோங்கரே ஆய்வு செய்தார். இதில் அந்த காரின் டயர்கள், பின்பக்க கண்ணாடி ஆகியவற்றில் இருந்து சில அடையாளங்களை சேகரித்தார். அந்த அடையாளங்களை கொண்டு துப்புத்துலக்கிய போது கடத்தலில் ஈடுபட்ட காரை தனிப்படையினர் எளிதில் கண்டுபிடித்தனர். அதன்பிறகே காரின் பதிவு எண் கண்டுபிடிக்கப்பட்டது. பின்னர், காரின் உரிமையாளர் விவரம், கார் நிற்கும் இடம் போன்ற விவரங்களை கண்டுபிடிக்க முடிந்தது.

கடத்தல் சம்பவம் குறித்து போலீஸ் அதிகாரி ஒருவர் கூறுகையில், "இந்த ஆள்கடத்தல் வழக்கில் கைது செய்யப்பட்ட ராஜீவ்காந்தி, நூற்பாலை நடத்தி வருகிறார். சில ஆண்டுகளுக்கு முன்பு அவரிடம் இரிடியம் தருவதாக கூறி கவுர்மோகன்தாஸ் மற்றும் சிலர் பணம் பெற்று மோசடி செய்ததாக கூறப்படுகிறது. அந்த பணத்தை திரும்ப பெறுவதற்காக இந்த கடத்தலில் ஈடுபட்டார்களா என்பது குறித்தும் தீவிர விசாரணை நடந்து வருகிறது" என்றார்.