அம்மன் கோவில்களில் பக்தர்கள் கூட்டம் அலைமோதியது

அரியலூர் மேலத்தெருவில் உள்ள பெரியநாயகி அம்மன், படை பத்து மாரியம்மன், பூக்காரத்தெரு மாரியம்மன், திரவுபதி அம்மன் கோவில்களில் மஞ்சள் ஆடை அணிந்த பக்தர்கள் கோவில் வளாகத்திற்குள் பால்குடம் எடுத்து நேர்த்திக்கடனை நிறைவேற்றினார்கள். கோவில்களில் பல்வேறு அலங்காரங்களில் அம்மன் பக்தர்களுக்கு காட்சியளித்தார்.

சமூக இடைவெளியுடன் முக கவசம் அணிந்து பக்தர்கள் சாமி தரிசனம் செய்தனர். வழக்கமாக வெகு விமரிசையாக நடைபெறும் பால்குட ஊர்வலங்கள் இந்த ஆண்டு நடைபெறவில்லை. அனைத்து கோவில்களிலும் பக்தர்களுக்கு அன்னதானம் பார்சலில் வழங்கப்பட்டது.

தா.பழூரில் உள்ள விசாலாட்சி அம்மன் உடனுறை விஸ்வநாதர் கோவிலில் பிரகாரத்தில் உள்ள துர்க்கை அம்மனுக்கு சிறப்பு வழிபாடு நடைபெற்றது. இதையொட்டி விஸ்வநாதர், விசாலாட்சி அம்மன் மற்றும் துர்க்கை அம்மனுக்கு மஞ்சள்பொடி, மாப்பொடி, திரவியப் பொடி, வில்வப் பொடி, அருகம்புல் பொடி, பால், தயிர், சந்தனம், தேன், இளநீர், கரும்புச்சாறு உள்ளிட்ட பல்வேறு திரவியங்களை கொண்டு சிறப்பு அபிஷேகம் நடைபெற்றது. பின்னர் சுவாமி மலர் அலங்காரத்தில் பக்தர்களுக்கு அருள்பாலித்தார். துர்க்கை அம்மனுக்கு சிறப்பு அலங்காரம் செய்யப்பட்டு மகா தீபாராதனை நடைபெற்றது. இதற்கான ஏற்பாடுகளை துர்க்கை அம்மன் வார வழிபாட்டு குழுவினர் செய்திருந்தனர்.