மூதாட்டியிடம் தங்கசங்கிலி பறித்த பெயிண்டர் கைது

புதுச்சேரி, ஜூலை.24-

புதுச்சேரி பவள நகர் புதுத்தெருவை சேர்ந்தவர் சிவசண்முகம் (வயது 57). வீட்டின் முதல் தளத்தில் வசித்து வருகிறார். கீழ்தளத்தில் இவரது தாயார் ராஜவேணி (86) வசித்து வருகிறார். இந்தநிலையில் சம்பவத்தன்று வீட்டிற்குள் புகுந்த மர்ம நபர் அங்கு டி.வி. பார்த்துக் கொண்டிருந்த ராஜவேணி கழுத்தில் அணிந்திருந்த 4 பவுன் தங்க சங்கிலியை பறித்துச் சென்றார். 

இதுகுறித்த புகாரின் பேரில் ரெட்டியார்பாளையம் போலீசார் வழக்குப்பதிவு செய்து விசாரித்தனர். இதில் ராஜவேணி வீட்டில் பெயிண்டிங் வேலை பார்த்த வாழைக்குளம் முருகேசகிராமணி தோட்டத்தை சேர்ந்த பெயிண்டர் குமார் (27) மீது போலீசாருக்கு சந்தேகம் ஏற்பட்டது. அவரை பிடித்து விசாரித்தபோது ராஜவேணியிடம் தங்க சங்கிலி பறித்ததை  குமார் ஒப்புக்கொண்டார். இதையடுத்து அவரை போலீசார் கைது செய்தனர். தங்க நகையையும் மீட்டனர்.