கடத்தல் மற்றும் விற்பனையில் ஈடுபட்ட 155 நபர்கள் மீது வழக்கு; இதுவரை ரூ.86 லட்சம் புகையிலை பொருட்கள் பறிமுதல்

திருவள்ளூர், 

திருவள்ளூர் மாவட்டத்தில் தடை செய்யப்பட்ட குட்கா உள்ளிட்ட புகையிலை பொருட்கள் கடத்தல் மற்றும் சட்டவிரோதமாக விற்பனை செய்வதை தடுக்கும் பொருட்டு கடும் நடவடிக்கைகள் எடுக்கப்பட்டு வருகிறது.

கடந்த ஜனவரி முதல் இம்மாதம் 22-ந்தேதி வரை குட்கா உள்ளிட்ட புகையிலை பொருட்கள் கடத்தல் மற்றும் விற்பனையில் ஈடுபட்ட 155 நபர்கள் மீது 135 குற்ற வழக்குகள் பதிவு செய்யப்பட்டு சுமார் ரூ.86 லட்சத்து 70 ஆயிரத்து 382 மதிப்புள்ள 11 ஆயிரத்து 389 கிலோ புகையிலை பொருட்களும் பறிமுதல் செய்யப்பட்டுள்ளன.

மேலும் கடத்தலுக்கு பயன்படுத்திய 4 கனரக வாகனங்கள், 9 இலகுரக வாகனங்கள், 3 இருசக்கர வாகனங்கள் உள்ளிட்ட 16 வாகனங்களும் பறிமுதல் செய்யப்பட்டுள்ளது. மேலும் இவ்வாறான செயல்களில் ஈடுபடுபவர்கள் மீது குண்டர் சட்டம் மற்றும் தேசியப் பாதுகாப்பு சட்டத்தின் கீழ் நடவடிக்கை மேற்கொள்ள உத்தேசிக்கப்பட்டுள்ளது.

பொதுமக்கள் தங்கள் பகுதியில் குட்கா உள்ளிட்ட புகையிலை பொருட்கள் கடத்தல் மற்றும் விற்பனை செய்யப்படுவது பற்றி தெரிந்தால் திருவள்ளூர் மாவட்ட போலீஸ் சூப்பிரண்டுக்கு 6379904848 என்ற எண்ணில் தொலைபேசி மூலமாகவோ- வாட்ஸ்-ஆப் மூலமாகவோ தகவல் தெரிவிக்கலாம். தகவல் தருபவர்களுக்கு தக்க சன்மானம் வழங்கப்படும் என அந்த அறிக்கையில் கூறப்பட்டு இருந்தது.