பெங்களூருவில் தலையில் கல்லைப்போட்டு ஆட்டோ டிரைவர் கொலை

பெங்களூரு:

  பெங்களூரு ஜெயநகர் அருகே எடியூரில் வசித்து வந்தவர் ஆகாஷ் தீபு(வயது 32). டிரைவரான இவர், ஆட்டோ ஓட்டி வந்தார். நேற்று முன்தினம் இரவு வீட்டை விட்டு வெளியே சென்ற ஆகாஷ் தீபு நள்ளிரவு வரை திரும்பி வரவில்லை. இந்த நிலையில், நேற்று அதிகாலையில் ஜெயநகர் 4-வது பிளாக்கில் உள்ள வணிக வளாகத்தையொட்டி ஒரு வாலிபர் தலை நசுங்கியபடி கொலை செய்யப்பட்டு கிடந்தார்.

  இதைப்பார்த்து அதிர்ச்சி அடைந்த அப்பகுதி மக்கள், ஜெயநகர் போலீசாருக்கு தகவல் தெரிவித்தனர். போலீசார் விரைந்து வந்து வாலிபரின் உடலை கைப்பற்றி விசாரித்தனர். அப்போது அவர், ஆட்டோ டிரைவரான ஆகாஷ் தீபு என்று உடல் அடையாளம் காணப்பட்டது. அவரது தலையில் கல்லைப்போட்டு மர்மநபர்கள் கொலை செய்திருந்தார்கள்.

  மேலும் ஆகாஷ் தீபுவை, அவருக்கு தெரிந்த நபர்கள் அல்லது அவரது நண்பர்களே கொலை செய்திருக்கலாம் என்று போலீசார் சந்தேகிக்கின்றனர். அத்துடன் முன்விரோதம் அல்லது பணப்பிரச்சினை காரணமாக இந்த கொலை நடந்திருக்க வாய்ப்புள்ளதாகவும் போலீசார் கருதுகின்றனர். ஆனால் ஆகாஷ் தீபுவை கொலை செய்த நபர்கள் யார்?, அதற்கான சரியான காரணம் என்ன? என்பது தெரியவில்லை.

  இதையடுத்து, மர்மநபர்களை பிடிக்க அப்பகுதியில் உள்ள கண்காணிப்பு கேமராக்களை கைப்பற்றி போலீசார் ஆய்வு செய்து வருகின்றனர். இதுகுறித்து ஜெயநகர் போலீசாா் வழக்குப்பதிவு செய்து விசாரணை நடத்தி வருகின்றனர். மேலும் தலைமறைவாகி விட்ட மர்மநபர்களை போலீசார் வலைவீசி தேடிவருகிறார்கள்.