35 ஆயிரம் தென்னை மரக்கன்றுகள் விற்பனை-கலெக்டர் தகவல்

 சிங்கம்புணரி தாலுகாவுக்கு உட்பட்ட எஸ்.வி.மங்களம் ஊராட்சியில் வேளாண்மை துறையின் மூலம் தென்னை நாற்றுப்பண்ணை செயல்பட்டு வருகிறது. இதை கலெக்டர் மதுசூதன்ரெட்டி ஆய்வு செய்தார். அங்கு வளர்க்கப்படும் தென்னை ரகங்களை நேரில் பார்வையிட்டார். இது குறித்து கலெக்டர் கூறியதாவது:-
முழு மானியம்

 இந்த அரசு பண்ணையில் நெட்டை தென்னங்கன்று ரூ.60-க்கும் குட்டை, நெட்டை, ஒட்டு வகை கன்றுகள் ரூ.80-க்கும் விற்பனை செய்யப்படுகிறது. வெளிச்சந்தையில் தனியார் பண்ணையில் ஒப்பிடுகையில் அங்கு ஒரு கன்று ரூ.150 முதல் ரூ.200 வரை விற்பனை செய்யப்படுகிறது.
 தென்னை வளர்ச்சி வாரியம் மூலம் 500 ஏக்கர் வரை நடவு செய்து பராமரிக்கவும், பழைய தென்னங்கன்றுகள் பழுதடைந்து அல்லது நோய் தாக்குதலால் பாதிக்கப்பட்டு எவ்வித பயனும் இன்றி இருக்கும் மரங்களை அகற்றி அங்கு புதிய தென்னங்கன்று வைத்து பராமரிக்கும் வகையில் ஒரு எக்டருக்கு ரூ.53,500 வீதம் முழு மானியம் வழங்கப்படுகிறது. ஒருங்கிணைந்த பண்ணை விவசாய திட்டத்தின் மூலம் விவசாயிகள் பயன்பெறலாம்.
இதைத்தொடர்ந்து தென்னை நாற்றாங்கால் பண்ணையில் விவசாய மானிய திட்டத்தில் விதைகள், பூச்சி மருந்துகள், தென்னங்கன்றுகள் ஆகியவற்றை கலெக்டர் விவசாயிகளுக்கு வழங்கினார். அதனைத் தொடர்ந்து காளாப்பூர் ஊராட்சியில் குயவன் கண்மாய் அருகே விவசாயி சுதாகர் என்பவருக்கு சொந்தமான விளைநிலத்தில் 5 ஏக்கர் நிலப்பரப்பில் தென்னை சாகுபடி, நெல் சாகுபடி, மற்றும் மற்றொரு பகுதியில் தேனீ வளர்ப்புப் பெட்டிகள், இவற்றுடன் ஆடுகள் மற்றும் கறவை மாடுகள் வளர்த்து பராமரிக்கப்பட்டு வருவதை பார்வையிட்டார்.
இந்த ஆய்வின் போது வேளாண்மை துணை இயக்குனர் பன்னீர்செல்வம், உதவி இயக்குனர் அம்சவேணி, வேளாண்மை உதவி அலுவலர் சாமுண்டீஸ்வரி, எஸ்.வி.மங்களம் ஊராட்சி மன்ற தலைவர் கலைச்செல்வி சீனிவாசன், அ.காளாப்பூர் அம்பலகாரர் பார்த்திபன் அம்பலம் மற்றும் அரசு அலுவலர்கள் பலர் கலந்து கொண்டனர