<
தஞ்சை மாநகரில், 2-வது நாளாக சாலையோர கடைகளை அகற்ற தி.மு.க.வினர் எதிர்ப்பு
தஞ்சை மாநகரில் 2-வது நாளாக சாலையோர கடைகளை அகற்ற தி.மு.க.வினர் எதிர்ப்பு தெரிவித்ததால் மாநகராட்சி அதிகாரிகள் அகற்றாமல் திரும்பி சென்றனர்.
தஞ்சாவூர்,
தஞ்சை பழைய பஸ் நிலையம், ‘ஸ்மார்ட் சிட்டி’ திட்டத்தின் கீழ் ரூ.14 கோடியே 65 லட்சம் செலவில் கட்டப்பட்டு பணிகள் முடிவடைந்து விட்டது. விரைவில் மக்கள் பயன்பாட்டுக்கு திறந்து விடப்பட உள்ளது. இந்த பஸ் நிலையத்திற்கு 4 வாயில்கள் அமைக்கப்பட்டுள்ளன. மேற்கு பகுதியில் 2 வாயில்களும், கிழக்கு பகுதியில் 2 வாயில்களும் அமைக்கப்பட்டுள்ளன.
இந்த பஸ் நிலையத்தின் மேற்கு பகுதியில் போக்குவரத்துக்கு இடையூறாக சாலையோரம் உள்ள பழக்கடைகளை அகற்ற மாநகராட்சி நிர்வாகம் முடிவு செய்தது.
அதன்படி நேற்று முன்தினம் மாநகராட்சி அதிகாரிகள் ஆக்கிரமிப்புகளை அகற்ற சென்றபோது, கடைகாரர்களுக்கு ஆதரவாக தி.மு.க. எம்.எல்.ஏ. டி.கே.ஜி.நீலமேகம், கடைகளை அகற்றகூடாது என எதிர்ப்பு தெரிவித்ததுடன் அங்கேயே அமர்ந்திருந்ததால் கடைகளை அகற்றாமல் அதிகாரிகள் திரும்பி சென்றனர்.
நேற்று 2-வது நாளாக மாநகராட்சி உதவி செயற்பொறியாளர் ராஜசேகரன் மற்றும் அதிகாரிகள் பொக்லின் எந்திரத்துடன் சாலையோர கடைகளை அகற்ற சென்றனர். அங்கு போலீசாரும் குவிக்கப்பட்டனர். பழக்கடைகள் அகற்ற அதிகாரிகள் முயற்சி செய்வதை அறிந்த வியாபாரிகள், தி.மு.க.வினர் ஒன்று திரண்டு வந்து பொக்லின் எந்திரத்தை முற்றுகையிட்டு எதிர்ப்பு தெரிவித்தனர்.
இந்த தகவல் அறிந்து அங்கு வந்த ஆணையர் சரவணகுமாரை வியாபரிகள் மற்றும் தி.மு.க.வினர் சூழ்ந்து கொண்டு கடைகளை அகற்றக்கூடாது என தெரிவித்தனர். இதனால் அங்கு ஆக்கிரமிப்பை அகற்ற முடியவில்லை.
இதையடுத்து பழக்கடைகளை போக்குவரத்துக்கு இடையூறு இல்லாமல் தற்காலிகமாக வைத்து கொள்ளுங்கள் என கூறிவிட்டு அதிகாரிகள் அங்கிருந்து புறப்பட்டு சென்றனர்.
இதுகுறித்து மாநகராட்சி ஆணையர் சரவணகுமார் கூறும்போது, தஞ்சை பழைய பஸ் நிலையம் பகுதியில் சாலையோரத்தில் ஆக்கிரமிக்கப்பட்டுள்ள 20-க்கும் மேற்பட்ட பழக்கடைகளை அகற்றி அங்கு சாலை அமைக்கப்பட உள்ளது.
இதற்காக ஆக்கிரமிப்புகளை அகற்ற சென்றபோது கடைகாரர்களும், தி.மு.க.வினரும் எதிர்ப்பு தெரிவித்தனர். அவர்களிடம் நாங்கள் தொடர்ந்து பேசி வருகிறோம். விரைவில் ஆக்கிரமிப்புகள் அகற்றப்படும் என்றார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
