லாரி டிரைவரிடம் பணம், செல்போன் பறித்த 3 பேர் கைது

வத்தலக்குண்டு:

பெரம்பலூரை சேர்ந்தவர் துரை(வயது 45). லாரி டிரைவர். இவர் ஓசூரில் இருந்து காபி டப்பாக்களை ஏற்றிக்கொண்டு வைகை அணை அருகே உள்ள ஒரு தனியார் காபி கம்பெனிக்கு சென்று கொண்டிருந்தார். வழியில் வத்தலக்குண்டுவை தாண்டி கட்டக்காமன்பட்டி அருகே நேற்று அதிகாலை சென்றபோது அங்கிருந்த 3 பேரிடம் டிரைவர் துரை வைகை அணைக்கு வழிகேட்டார். 

இந்தநிலையில் அவர்கள் 3 பேரும் திடீரென துரை வைத்திருந்த ரூ.2 ஆயிரம் மற்றும் செல்போனை பறித்துக்கொண்டு அங்கிருந்து தப்பியோடி விட்டனர். இதுகுறித்து துரை வத்தலக்குண்டு போலீஸ் நிலையத்தில் புகார் செய்தார். அதன்பேரில் இன்ஸ்பெக்டர் குமரன், சப்-இன்ஸ்பெக்டர் ராஜா ஆகியோர் வழக்குப்பதிவு செய்து விசாரணை நடத்தி டிரைவரிடம் பணம் மற்றும் செல்போன் பறித்த கட்டக்காமன்பட்டியை சேர்ந்த சாந்தகுமார் (28), சங்கர் (36), கெங்குவார்பட்டியை சேர்ந்த உமாமகேஸ்வரன் (40) ஆகிய 3 பேரை கைது செய்தனர்