சேந்தமங்கலம் அருகே லாரி மோதி தொழிலாளி பலி

சேந்தமங்கலம்:

சேந்தமங்கலம் அருகே உள்ள முத்துகாப்பட்டி புதுக்கோம்பையை சேர்ந்தவர் கார்த்திகேயன் (வயது 32). இவர் அக்கியம்பட்டி அருகே உள்ள ஒரு தனியார் பால் பண்ணையில் பேக்கேஜ் பிரிவில் தொழிலாளியாக வேலை பார்த்து வந்தார். இந்த நிலையில் நேற்று அவர் மோட்டார்சைக்கிளில் சேந்தமங்கலம் அருகே வடுகப்பட்டி- அலங்காநத்தம் பிரிவு ரோடு அருகே சென்று கொண்டிருந்தார். அப்போது எதிர்பாராதவிதமாக அந்த வழியாக வந்த லாரி கண்இமைக்கும் நேரத்தில் கார்த்திகேயன் ஓட்டிச்சென்ற மோட்டார்சைக்கிள் மீது மோதியது. இதில் தூக்கி வீசப்பட்டு பலத்த காயம் அடைந்த அவர் சம்பவ இடத்திலேயே பரிதாபமாக உயிரிழந்தார். 

இந்த விபத்து அறிந்து சம்பவ இடத்துக்கு சென்ற சேந்தமங்கலம் போலீசார் பலியான கார்த்திகேயனின் உடலை மீட்டு பிரதே பரிசோதனைக்காக சேந்தமங்கலம் அரசு ஆஸ்பத்திரிக்கு அனுப்பி வைத்தனர். மேலும் இந்த விபத்து குறித்து வழக்குப்பதிவு செய்து லாரி டிரைவரை போலீசார் தேடி வருகின்றனர். விபத்தில் பலியான கார்த்திகேயனுக்கு, திலகவதி (23) என்ற மனைவியும், தருண் (1½) என்ற மகனும் உள்ளனர்.