2-ம் நிலை பெண் காவலர்களுக்கான உடற்தகுதி தேர்வு தொடக்கம்

கடலூர், ஆக.4-

தமிழ்நாடு சீருடை பணியாளர் தேர்வாணையத்தால் காவல்துறை, சிறைத்துறை மற்றும் தீயணைப்புத்துறை ஆகிய துறைகளுக்கான 2-ம் நிலை காவலர்களுக்கான உடற்தகுதி தேர்வு கடலூர் அண்ணா விளையாட்டு மைதானத்தில் கடந்த 26-ந்தேதி முதல் தொடங்கி நடைபெற்று வருகிறது.

இதில் எழுத்துத்தேர்வில் தேர்ச்சி பெற்ற கடலூர், கள்ளக்குறிச்சி மாவட்டத்தை சேர்ந்த நபர்களுக்கு அழைப்பு விடுக்கப்பட்டது. அவர்கள் ஆர்வத்துடன் பங்கேற்றனர். நேற்று முன்தினம் வரை முதல் கட்டமாக ஆண்களுக்கான உடற்தகுதி தேர்வில் 1822 பேர் தேர்ச்சி பெற்றுள்ளனர். இவர்களுக்கு நீளம், உயரம் தாண்டுதல் உள்ளிட்ட 2-ம் கட்ட தேர்வு நாளை மறுநாள் (வெள்ளிக்கிழமை) தொடங்குகிறது.

இந்நிலையில் நேற்று 2-ம் நிலை காவலர்களில் பெண் காவலர்களுக்கான உடற்தகுதி தேர்வு நேற்று கடலூர் அண்ணா விளையாட்டு மைதானத்தில் தொடங்கியது. இதற்காக காலை 6 மணிக்கே பெண்கள் ஆர்வத்துடன் வரத்தொடங்கினர். ஆனால் 1046 பேரில் முதல் நாள் 400 பேருக்கு அழைப்பு விடுத்ததில் 304 பேர் மட்டும் பங்கேற்றனர். 96 பேர் வரவில்லை. அவர்களுக்கு சான்றிதழ் சரிபார்த்தல், உயரம் அளவீடு செய்தல், 400 மீட்டர் தூரத்தை 2.30 நிமிடங்களில் கடந்து வருதல் ஆகிய தேர்வு நடந்தது.

இதில் 228 பேர் தேர்ச்சி பெற்றுள்ளனர். தொடர்ந்து 2-வது நாளாக இன்றும் (புதன்கிழமை), நாளையும் (வியாழக்கிழமை) பெண்களுக்கான முதல் கட்ட உடற்தகுதி தேர்வு நடக்கிறது. முதல் கட்ட தேர்வில் தேர்ச்சி பெற்றவர்களுக்கு வருகிற 12-ந்தேதி தொடங்கும் 2-ம் கட்ட தேர்வில் கலந்து கொள்வார்கள்.

முன்னதாக இந்த தேர்வு பணிகளை சென்னை தமிழ்நாடு சிறப்பு காவல் படை போலீஸ் டி.ஐ.ஜி. எழிலரசன், மாவட்ட போலீஸ் சூப்பிரண்டு சக்தி கணேசன் ஆகியோர் நேரில் பார்வையிட்டு ஆய்வு செய்தனர். இந்த தேர்வுகள் அனைத்தும் வீடியோ மூலம் பதிவு செய்யப்பட்டு வருவது குறிப்பிடத்தக்கது.