சமூக வலைத்தள குற்றங்கள் குறித்து பெண்கள் தைரியமாக புகார் தெரிவிக்கலாம்-போலீஸ் சூப்பிரண்டு பேட்டி

சிவகங்கை மாவட்ட போலீஸ் சூப்பிரண்டு செந்தில்குமார் நிருபர்களுக்கு அளித்த பேட்டியில் கூறியதாவது:-
சிவகங்கை மாவட்டத்தில் 43 போலீஸ் நிலையங்கள் உள்ளன.இந்த போலீஸ் நிலையத்திற்கு உட்பட்ட பகுதிகளில் சட்டம், ஒழுங்கு பராமரிப்பு, மற்றும் குற்றச்செயல் தடுப்பு நடவடிக்கைக்காக தற்போது 24 மணி நேரமும் ரோந்து சுற்றும் வகையில் போலீஸ் பாதுகாப்பு போடப்பட்டுள்ளது. இதற்காக சிவகங்கை மாவட்டம் 85 பிரிவுகளாகப் பிரிக்கப்பட்டுள்ளது. இதில் சிவகங்கை, மானாமதுரை, மற்றும் திருப்புவனம் ஆகிய ஊர்களில் தலா 4 பிரிவுகளாகவும் திருப்பத்தூர், தேவகோட்டை, மற்றும் காரைக்குடி ஆகிய ஊர்கள் தலா மூன்று பிரிவுகளாகவும் மற்ற பகுதிகள் தலா இரண்டு பிரிவுகளாகவும் பிரிக்கப்பட்டுள்ளது.
இது தவிர தற்போது புதியதாக முகத்தை வைத்து குற்றவாளிகளை கண்டறியும் முறை கொண்டுவரப்படுகிறது. இதன் மூலம் சந்தேகப்படும் ஒருவரின் முகத்தை கேமராவில் பதிவு செய்தால் அந்த நபர் மாநிலத்தில் எங்கு குற்றச் செயலில் ஈடுபட்டு பிடிபட்டு இருந்தாலும் அவரது விவரம் உடனடியாக தெரிந்து விடும். தற்போது புதியதாக திருப்பத்தூர் மற்றும் தேவகோட்டை பகுதிகளில் நெடுஞ்சாலை ரோந்து போலீசார் நியமிக்கப்பட்டுள்ளனர்.
மேலும் பெண்களுக்கு எதிராக சமூக வலைத்தளங்களில் நடைபெறும் குற்றங்கள் குறித்து இணையதளம் மூலமாக புகார் கொடுத்தாலும் நடவடிக்கை எடுக்கப்படும். சமீபத்தில் சிவகங்கை அருகே ஒரு சிறுமியின் புகைப்படத்தை ஆபாசமாக சித்தரித்து வலைத்தளங்களில் பதிவேற்றம் செய்ததாக வந்த புகாரின் மீது அவரது நண்பரை போலீசார் கைது செய்துள்ளனர்.
எனவே சமூக வலைத்தளங்களில் நடைபெறும் குற்றங்கள் குறித்து பெண்கள் தைரியமாக புகார் தரலாம். மாவட்டத்தில் திருடுபோன செல்போன்களை மீட்க நடவடிக்கை எடுக்கப்பட்டு வருகிறது.தற்போது வரை திருடுபோன சுமார் 35-க்கும் மேற்பட்ட செல்போன்கள் மீட்கப்பட்டுள்ளது.
 இவ்வாறு அவர் கூறினார்.
 பேட்டியின்போது கூடுதல் போலீஸ் சூப்பிரண்டு முரளிதரன், தனிப்பிரிவு இன்ஸ்பெக்டர் உதயகுமார் ஆகியோர் உடன் இருந்தனர்.