சுய உதவிக்குழுக்களுக்கு ரூ.3½ கோடி சுழல்நிதி கடன்-அமைச்சர் கே.ஆர்.பெரியகருப்பன் வழங்கினார்

தமிழக ஊரக வாழ்வாதார இயக்க திட்டத்தின் கீழ் மகளிர் குழுக்களுக்கு சுழல்நிதி கடன் உதவி வழங்கும் நிகழ்ச்சி திருப்பத்தூரில் நடைபெற்றது. நிகழ்ச்சிக்கு மாவட்ட கலெக்டர் மதுசூதன்ரெட்டி தலைமை தாங்கினார். ஊரக வளர்ச்சித்துறை அமைச்சர் கே.ஆர்.பெரியகருப்பன் கலந்துகொண்டு மகளிர் சுயஉதவிக்குழுக்களுக்கான சுழல்நிதி திட்ட கடன்களை வழங்கி பேசினார். அப்போது அவர் பேசியதாவது:-
 மறைந்த முன்னாள் முதல்-அமைச்சர் கருணாநிதியால் முதன் முதலில் மகளிர் பொருளாதாரம் முன்னேற்றம் பெறும் வகையில் இத்திட்டம் தொடங்கப்பட்டது. ஆரம்ப காலக்கட்டத்தில் சமூக நலத்துறையுடன் இணைந்திருந்த மகளிர் குழுக்களுக்கு ஊரக வளர்ச்சித்துறையின் மூலம் ஒருங்கிணைந்து தனி அலுவலர் நியமித்து இத்திட்டம் செயல்பட தொடங்கியது.
 இந்த நிகழ்ச்சியில் சிங்கம்புணரி, எஸ்.புதூர், கல்லல் ஆகிய ஊராட்சி ஒன்றியங்களுக்குட்பட்ட 190 மகளிர் குழுக்களுக்கு ரூ.1.1 கோடி சமுதாய முதலீட்டு நிதிக்கான காசோலையும், 226 மகளிர் குழுக்களுக்கு ரூ.1.37 கோடி மதிப்பீட்டில் நலிவுற்றோர் வறுமை குறைப்பு நிதிக்கான காசோலையும், 29 மகளிர் சுய உதவிக்குழுக்களுக்கு ரூ.1.3 கோடி வங்கிகள் மூலம் கடன் திட்ட உதவிகள் உள்ளிட்ட 445 குழுக்களுக்கு ரூ.3.52 கோடி மதிப்பிலான கடன் உதவிகள் வழங்கப்பட்டன.
நிகழ்ச்சியில் மாவட்ட மகளிர் திட்ட இயக்குனர் வானதி, மகளிர் திட்ட உதவி அலுவலர் விஷ்ணுதரன், தாசில்தார் ஜெயந்தி, மாவட்ட ஊராட்சிக்குழு உறுப்பினர் ரவி மற்றும் அரசு அலுவலர்கள் உள்பட பலர் கலந்துகொண்டனர்.