வேன் மோதி விவசாயி பலி

அழகியபாண்டியபுரம்:

பூதப்பாண்டி அருகே வேன் மோதியதில் விவசாயி பரிதாபமாக இறந்தார்.

 பூதப்பாண்டி அடுத்த கலுங்கடி பகுதியை சேர்ந்தவர் மாணிக்கம் (வயது 74), விவசாயி. இவருக்கு மனைவி, 2 மகன்களும், ஒரு மகளும் உள்ளனர். 

நேற்று முன்தினம் மாணிக்கம் பூதப்பாண்டி அடுத்த ஆண்டிதோப்பு பகுதியில் சாலையில் நடந்து சென்று கொண்டிருந்தார். அப்போது ஆரல்வாய்மொழியில் இருந்து  ஆட்களை ஏற்றிக்கொண்டு ஒரு வேன் துவரங்காடு வழியாக கிருஷ்ணன்கோவில் நோக்கி சென்றது.

 ஆண்டிதோப்பு பகுதியில் வந்த போது, திடீரென வேன் சாலையில் நடந்து சென்று கொண்டிருந்த மாணிக்கத்தின் மீது மோதியது. இதில், தூக்கி வீசப்பட்டு படுகாயம் அடைந்த அவரை அக்கம் பக்கத்தினர் மீட்டு சிகிச்சைக்காக ஆசாரிபள்ளம் அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு தீவிர சிகிச்சை அளித்தும் பலனின்றி மாணிக்கம் பரிதாபமாக பலியானார்.

 இதுகுறித்த புகாரின் பேரில் பூதப்பாண்டி போலீசார் வழக்குப்பதிவு செய்து விசாரணை நடத்தி வருகிறார்கள்.