சிங்காநல்லூரில் பூட்டிய வீட்டில் 40 பவுன் நகை, பணம் கொள்ளை

கோவை,

கோவை சிங்காநல்லூரில் உள்ள நந்தாநகர் அடுக்குமாடி குடியிருப்பில் ஏராளமானோர் வசித்து வருகின்றனர். இங்குள்ள 3-வது மாடியில் வசித்து வருபவர் சுரேஷ்குமார். இவர் ஈரோடு புளியம்பட்டியில் உள்ள தனது உறவினர் வீட்டு நிகழ்ச்சியில் கலந்து கொள்ள சென்றிருந்தார். இந்த நிலையில் வீட்டில் ஆள் இல்லாததை நோட்டமிட்ட மர்ம நபர்கள் இவரது வீட்டு கதவின் பூட்டை உடைத்து உள்ளே புகுந்தனர்.

பின்னர் வீட்டில் பீரோவில் இருந்த 40 பவுன் நகை, ரூ.3 லட்சம் பணம் ஆகியவற்றை கொள்ளையடித்து விட்டு தப்பித்து விட்டனர். ஆள் இல்லாத வீட்டின் பூட்டு உடைக்கப்பட்டு இருப்பதை கண்ட அருகில் உள்ளவர்கள் உடனே சிங்காநல்லூர் போலீஸ் மற்றும் சுரேஷ் குமாருக்கு தகவல் கொடுத்தனர். தகவலின் பேரில் மற்றும் போலீசார் அந்த வீட்டிற்கு விரைந்து சென்றனர். பின்னர் கொள்ளை நடைபெற்ற வீட்டை பார்வையிட்டு சோதனை மேற்கொண்டனர்.

கொள்ளை சம்பவம் குறித்து தகவல் அறிந்ததும் கோவை மாநகர துணை போலீஸ் கமிஷனர் (குற்றம்) உமா மற்றும் உதவி கமிஷனர் (கிழக்கு) வீரபாண்டி உள்ளிட்டோர் விரைந்து சென்று கொள்ளை சம்பவம் குறித்து அங்கு வசிப்பவர்களிடம் விசாரணை நடத்தினர். வீட்டு உரிமையாளருக்கு நேற்று இரவு தான் தகவல் கிடைத்ததால் புளியம்பட்டியில் இருந்து விரைந்து கோவை திரும்பினார்.

மேலும் தடவியல் நிபுணர்கள் வரவழைக்கப்பட்டு, கொள்ளை நடந்த வீட்டில் பதிவாகி இருந்த கைரேகைகள் உள்ளிட்ட தடயங்களை சேகரித்தனர். மேலும் அந்த பகுதியில் பொருத்தப்பட்டு உள்ள கண்காணிப்பு கேமராக்களில் பதிவான காட்சிகளை ஆய்வு செய்து கொள்ளை சம்பவத்தில் ஈடுபட்ட மர்ம நபர்களை அடையாளம் காணும் முயற்சியில் போலீசார் ஈடுபட்டு உள்ளனர்.