மோட்டார்சைக்கிள் விபத்தில் தொழிலாளி பலி

உத்தமபாளையம்:

ராயப்பன்பட்டி அருகே உள்ள அணைப்பட்டியை சேர்ந்தவர் முரளி (வயது 35). கூலித்தொழிலாளி. இவரது தம்பி உடல்நிலை சரியில்லாமல், கம்பம் அரசு மருத்துவமனையில் சிகிச்சை பெற்று வந்தார். அவரை பார்ப்பதற்காக, முரளி, மோட்டார் சைக்கிளில் கம்பம் சென்றார். பின்னர் அவர் ஊருக்கு திரும்புவதற்காக ராயப்பன்பட்டி வழியாக மோட்டார்சைக்கிளில் வந்து கொண்டு இருந்தார். அப்போது எதிர்பாராதவிதமாக மோட்டார்சைக்கிள் திடீரென நிலைதடுமாறி அருகே இருந்த தென்னந்தோப்பு வேலியில் மோதியது. இதில் முரளி கீழே விழுந்து பலத்த காயம் அடைந்தார். அவரை ராயப்பன்பட்டி போலீசார் மீட்டு கம்பம் அரசு மருத்துவமனைக்கு சிகிச்சைக்காக அனுப்பி வைத்தனர். ஆனால் செல்லும் வழியிலேயே அவர் பரிதாபமாக இறந்தார். இதுகுறித்து ராயப்பன்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.