மோட்டார் சைக்கிளில் சென்றவர் பலி

ராஜபாளையம்,

தென்காசி மாவட்டம் கடையநல்லூர் அருகே உள்ள கிருஷ்ணாபுரத்தை சேர்ந்தவர் மகேஷ்வரன் (வயது 39). இவர் நேற்று மாலை தனது மோட்டார்சைக்கிளில் ஹெல்மெட் அணிந்தவாறு, ஸ்ரீவில்லிபுத்தூர் நோக்கி சென்று கொண்டிருந்தார். அப்போது ராஜபாளையம் அருகே எம்.பி.கே. புதுப்பட்டி விலக்கு அருகே சென்று கொண்டிருந்த போது, எதிரே மதுரை சாலையில் இருந்து ராஜபாளையம் நோக்கி வந்து கொண்டிருந்த மினி வேன் மகேஷ்வரன் சென்ற மோட்டார்சைக்கிள் மீது மோதியது.

இதில் மகேஷ்வரன் அணிந்திருந்த தலைக்கவசம் உடைந்ததில், தலை உள்ளிட்ட இடங்களில் ஏற்பட்ட பலத்த காயங்களால் அவர் சம்பவ இடத்திலேயே பரிதாபமாக உயிரிழந்தார். மினி வேன் டிரைவர், வேனை நிறுத்தி விட்டு அங்கிருந்து தப்பி விட்டார். இதுகுறித்து தகவல் அறிந்த ராஜபாளையம் வடக்கு போலீசார் சம்பவ இடத்திற்கு விரைந்து வந்து விசாரணை மேற்கொண்டனர். பின்னர் மகேஷ்வரனின் உடலை கைப்பற்றிய போலீசார் பிரேத பரிசோதனைக்காக ராஜபாளையம் அரசு மருத்துவமனைக்கு அனுப்பி வைத்தனர். தப்பி ஓடிய வேன் டிரைவரை போலீசார் வலைவீசி தேடி வருகின்றனர்.