திண்டிவனம் பகுதியில் தொடர் கொள்ளையில் ஈடுபட்ட மதபோதகர், கோவில் பூசாரி உள்பட 8 பேர் கைது

மயிலம், 

விழுப்புரம் மாவட்டம் திண்டிவனம் அருகே உள்ள ஜக்காம்பேட்டையை சேர்ந்தவர் ஜெகன். போலீஸ் பயிற்சி மைய உரிமையாளரான இவர், தனது வீட்டை பூட்டி விட்டு கல்பாக்கத்தில் உள்ள தனது மாமியார் வீட்டுக்கு சென்றிருந்தார். அப்போது நள்ளிரவில் வீட்டின் கதவு பூட்டை உடைத்து உள்ளே புகுந்த மர்மநபர்கள் பீரோவில் இருந்த 2 பவுன் நகை, ரூ.20 ஆயிரம் ரொக்கம், ஒரு மடிக் கணினி ஆகியவற்றை கொள்ளையடித்தனர். மேலும் இவருடைய மாடி வீட்டில் வசித்து வந்த ரமேசின் வீட்டுக்குள் புகுந்த மர்மநபர்கள் 20 பவுன் நகை, ரூ.20 ஆயிரம் ரொக்கம், ஒரு மடிக்கணினி ஆகியவற்றையும் கொள்ளையடித்து சென்றனர். இதுதவிர திண்டிவனம் பகுதியில் தனியாக செல்லும் பெண்களை குறி வைத்து ஒரு கும்பல் நகைகளையும் பறித்து வந்தது. கோவில்களிலும் திருட்டு சம்பவங்கள் அரங்கேறின. 

இந்த கும்பலை பிடிக்க திண்டிவனம் துணை போலீஸ் சூப்பிரண்டு கணேசன் தலைமையில் மயிலம் இன்ஸ்பெக்டர் கிருபாலட்சுமி மற்றும் போலீசார் தனிப்படை அமைத்து விழுப்புரம் மாவட்ட போலீஸ் சூப்பிரண்டு ஸ்ரீநாதா உத்தரவிட்டார்.  இந்த தனிப்படையினர், மயிலம் பொறியியல் கல்லூரி பஸ் நிறுத்தம் அருகே நேற்று வாகன தணிக்கையில் ஈடுபட்டனர். அப்போது அந்த வழியாக வந்த காரை நிறுத்துமாறு போலீசார் சைகை காண்பித்தனர். ஆனால் அந்த கார் நிற்காமல், போலீசார் மீது மோதுவதுபோல் வந்து மின்னல் வேகத்தில் சென்றது. 

உடனே போலீசார் தங்களது வாகனத்தில் துரத்தி சென்று, அந்த காரை மடக்கினர். காரில் இருந்த 8 பேரிடம் போலீசார் விசாரணை நடத்தினர். விசாரணையில் அவர்கள், நெல்லை மாவட்டம் அயன் சிங்கம்பட்டி அம்மைவரத்தை சேர்ந்த ராஜா மகன் மகேந்திரன்(வயது 39), நெல்லை மேலப்பாளையத்தை சேர்ந்த மைதீன் லப்பை மகன் புரோஸ்கான்யாசர்(27), நெல்லை ராஜவள்ளிபுரம் இந்திரா நகரை சேர்ந்த ஆறுமுகம் மகன் மதிபாலன்(27), விக்கிரவாண்டி தென்பேர் மாதா கோவில் தெருவை சேர்ந்த கிறிஸ்தவ மத போதகர் ஏழுமலை(47), திருப்பூர் பள்ளிபாளையம் அவிநாசியை சேர்ந்த கிட்டுசாமி மகன் ஆனந்தகுமார்(23), அவிநாசி திருமுருகன் பூண்டியை சேர்ந்த ராஜேந்திரன் மகன் விஜய்பாண்டியன்(20), கீழ்மயிலத்தை சேர்ந்த நாகாத்தம்மன் புத்துகோவில் பூசாரி சக்திவேல்(47), திருவண்ணாமலை மாவட்டம் செய்யார் பகுதியை சேர்ந்த ஜெகன்நாதன் மகன் குமார்(38) ஆகியோர் என்பது தெரியவந்தது. 

மேலும் இவர்கள் 8 பேரும் வாட்ஸ்-அப்பில் குழு உருவாக்கி திண்டிவனம், மயிலம் பகுதியில் தொடர் கொள்ளையில் ஈடுபட்டதும் தெரியவந்தது. முதலில் இவர்கள் கோவில்களில் உள்ள இரிடியத்தை திருடி விற்பனை செய்து வந்துள்ளனர். தற்போது அதில் அதிக வருமானம் கிடைக்காததால், கொள்ளை, வழிப்பறி போன்ற சம்பவத்தில் ஈடுபட்டுள்ளனர். இதையடுத்து மகேந்திரன் உள்பட 8 பேரையும் போலீசார் கைது செய்தனர். அவர்களிடமிருந்து 26 பவுன் நகை, 1 கிலோ வெள்ளிப்பொருட்கள், 1 கார் ஆகியவை பறிமுதல் செய்யப்பட்டது.