15 சதவீத ஆசிரியர்களுக்கு 1-ந்தேதிக்குள் சிறப்பு முகாமில் கொரோனா தடுப்பூசி

கொரோனா தொற்று பரவல் காரணமாக கடந்த 1½ ஆண்டுக்கு மேலாக பூட்டி இருந்த பள்ளிகள் வருகிற செப்டம்பர் 1-ந்தேதி முதல் திறக்கப்பட உள்ளது. இதில் முதல் கட்டமாக 9-ம் வகுப்பு முதல் பிளஸ்-2 வரை வகுப்புகள் செயல்பட உள்ளது.
சிவகங்கை மாவட்டத்தில் 131 அரசு பள்ளிகளும், 59 அரசு உதவிபெறும் பள்ளிகளும், 96 மெட்ரிக் பள்ளிகளும், 6 ஆதிதிராவிடர் மற்றும் நகராட்சி பள்ளிகளும் உள்ளன.
 இதுதொடர்பாக சிவகங்கை மாவட்ட முதன்மை கல்வி அலுவலர் மணிவண்ணன் கூறியதாவது:-
மாவட்டத்தில் இதுவரை 85 சதவீதத்திற்கு மேற்பட்ட ஆசிரியர்கள் கொரோனா தடுப்பூசி போட்டுள்ளனர். மீதியுள்ள 15 சதவீத ஆசிரியர்கள் 1-ந்தேதிக்குள் கொரோனா தடுப்பூசி போட்டு கொள்ள அறிவுறுத்தப்பட்டு சிறப்பு முகாம் நடத்தப்படுகின்றன. மேலும் பள்ளிகளில் 50 சதவீத மாணவர்களை கொண்டு சுழற்சிமுறையில் வகுப்புகள் நடத்தப்பட்டுள்ளது. அரசு அறிவித்த வழிகாட்டுதலின்படி பள்ளிக்கூடத்திற்கு வரும் மாணவ-மாணவிகளுக்கு காய்ச்சல் உள்ளதா? என்று பரிசோதித்து பின் வகுப்புகளுக்கு அனுப்பும் படி அறிவுறுத்தப்பட்டு உள்ளது. அனைத்து பள்ளிகளிலும் கிருமிநாசினிகள் தெளிக்கப்பட்டு சுத்தம் செய்யப்பட்டுள்ளது. மாணவ-மாணவிகள் சமூக இடைவெளியுடன் அமர வைக்கவும் உத்தரவிடப்பட்டுள்ளது.
இவ்வாறு அவர் கூறினார்.