வியாபாரி கொலையில் மகளின் காதலன் உள்பட 2 பேர் கைது

பெங்களூரு: பெங்களூரு அருகே வியாபாரி கொலையில் மகளின் காதலன் உள்பட 2 பேர் கைது செய்யப்பட்டுள்ளனர். மகளை திருமணம் செய்து கொடுக்க எதிர்ப்பு தெரிவித்ததால் தீர்த்து கட்டியது அம்பலமாகிஉள்ளது.

பெங்களூரு புறநகர் மாவட்டம் நெலமங்களா தாலுகா குவெம்பு நகரை சேர்ந்தவர் நாகப்பா (வயது 49), வியாபாரி. இவருக்கு 2 மகள்கள் உள்ளனர். நாகப்பாவின் சொந்த ஊர் பல்லாரி மாவட்டம் ஆகும். கடந்த 20 ஆண்டுகளாக நெலமங்களாவில் தங்கி இருந்து அவர் வியாபாரம் செய்து வந்தார். கடந்த 24-ந் தேதி அதிகாலையில் குவெம்பு நகர் மெயின் ரோட்டில் நாகப்பா நடந்து சென்றார்.

அப்போது அங்கு வந்த 2 பேர், நாகப்பாவை வழிமறித்து, அவரை இரும்பு கம்பியால் தாக்கி கொலை செய்திருந்தனர். இதுகுறித்து நெலமங்களா டவுன் போலீசார் வழக்குப்பதிவு செய்து விசாரணை நடத்தினார்கள். அப்போது மகளின் காதலன் தான் தன்னுடைய நண்பருடன் சேர்ந்து நாகப்பாவை கொலை செய்தது தெரியவந்தது.

இதையடுத்து, மகளின் காதலனை போலீசார் தேடிவந்தனர். இந்த நிலையில், நாகப்பாவை கொலை செய்ததாக, அவரது மகளின் காதலன் நரேஷ் (28), அவரது நண்பர் வருண் (25) ஆகிய 2 பேரையும் நெலமங்களா டவுன் போலீசார் கைது செய்துள்ளனர். விசாரணையில், நாகப்பாவின் முதல் மகள் கல்லூரி ஒன்றில் படித்து வருகிறார். அதே குவெம்பு நகரில் வசிக்கும் நரேசுக்கும், நாகப்பாவின் மகளுக்கும் இடையே காதல் மலர்ந்துள்ளது. இருவரும் திருமணம் செய்யவும் முடிவு செய்தார்கள். இதுபற்றி நாகப்பாவுக்கு தெரியவந்ததும், காதலுக்கு எதிர்ப்பு தெரிவித்துள்ளார்.

இதன் காரணமாக நரேசுடன், அந்த மாணவி பேசாமல் இருந்து வந்துள்ளார். கடந்த 23-ந்தேதி மாணவியை சந்தித்து நரேஷ் தகராறு செய்துள்ளார். மேலும் நாகப்பாவை சந்தித்து, அவரது மகளை திருமணம் செய்துகொடுக்கும்படி நரேஷ் கேட்டுள்ளார். ஆனால் இதற்கு நாகப்பா மறுத்துள்ளார். இதனால் ஆத்திரமடைந்த நரேஷ் தனது நண்பருடன் சேர்ந்து மறுநாள் (24-ந் தேி) நாகப்பாவை கொலை செய்தது தெரியவந்தது. கைதான நரேஷ், வருண் மீது நெலமங்களா டவுன்போலீசார் வழக்குப்பதிவு செய்துள்ளனர்.