சின்னமனூர் அருகே மோட்டார் சைக்கிள்கள் மோதல்; தொழிலாளி பலி

சின்னமனூர்:

சின்னமனூர் அருகே 2 மோட்டார் சைக்கிள்கள் மோதிய விபத்தில் தொழிலாளி பலியானார். தம்பதி படுகாயம் அடைந்தனர். 

சின்னமனூர் அருகே உள்ள சீப்பாலக்கோட்டையை சேர்ந்தவர் ராசய்யா (வயது 45). கூலித்தொழிலாளி. இவர் தனது உறவினரின் இல்ல விழாவில் கலந்துகொள்வதற்காக நேற்று காலை மோட்டார் சைக்கிளில் ஓடைப்பட்டி நோக்கி சென்று கொண்டிருந்தார். எதிரே மற்றொரு மோட்டார் சைக்கிளில் ஜங்கல்பட்டியை சேர்ந்த தங்கராஜ் (58), தனது மனைவி தங்கத்துடன் (42) வந்து கொண்டிருந்தார். 

ஓடைப்பட்டி கருப்புசாமி கோவில் அருகே 2 மோட்டார் சைக்கிள்களும் வந்தபோது, எதிர்பாராதவிதமாக நேருக்குநேர் மோதிக்கொண்டன. இந்த விபத்தில் ராசய்யா தலையில் அடிபட்டு சம்பவ இடத்திலேயே இறந்தார். மற்றொரு மோட்டார் சைக்கிளில் வந்த தங்கம், அவரது கணவர் தங்கராஜ் ஆகியோர் படுகாயம் அடைந்தனர். 

இந்த விபத்து குறித்து தகவல் அறிந்த ஓடைப்பட்டி போலீசார் சம்பவ இடத்திற்கு விரைந்து வந்தனர். அப்போது படுகாயத்துடன் உயிருக்கு போராடிய தங்கம் மற்றும் தங்கராஜை போலீசார் மீட்டு சிகிச்சைக்காக சின்னமனூர் அரசு மருத்துவமனையில் சேர்த்தனர். மேலும் இறந்த ராசய்யாவின் உடலை பிரேத பரிசோதனைக்காக மருத்துவமனைக்கு அனுப்பி வைத்தனர். இதற்கிடையே உயிருக்கு ஆபத்தான நிலையில் தங்கம், மேல்சிகிச்சைக்காக மதுரை அரசு மருத்துவமனைக்கு அனுப்பி வைக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. 

இந்த விபத்து குறித்து ஓடைப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.